› 選擇地區
三藩市
紐約
洛杉磯
其他美國地區
香港 台灣 北美
 
2018年10月14日

《造星》今決賽六子自評勝算
大熱姜濤 認清敵友

【娛樂人物】ViuTV選秀節目《全民造星》自開播以來,引起無數話題,最後十強將於今晚進行決賽,選出終極男神。日前,《蘋果》請到六名參賽者姜濤、龍志權、李駿杰(Jeremy)、江熚生(Anson)、陳卓賢(Ian)及呂爵安(Edan)做專訪,要他們自評勝算。其中,賽前大熱的姜濤卻謙稱贏面只得一半,不過通過這次比賽,卻令他認清身邊的朋友。
撰文:黃曉妍
攝影:仇志德

相關新聞:賽前逐一點評監製花姐彈懶音反白眼

歷時四個多月的《全民造星》,今晚將選出終極男神,今次決賽的評選方式,除了由決賽現場的Lady GaGa御用排舞師Travis Payne、周慧敏及劉偉強等專業評判評分外,觀眾也可以在網上參與票選,兩者各佔總分一半,勝出者除獲頒「男神」名譽外,更可獨得100萬港元現金獎。換言之,人氣佔分極重,十強之中,19歲的姜濤實屬頂頭大熱,近日每當有他現身的場合,都會引來粉絲捧場與尖叫。ViuTV眼見姜濤的人氣,早前在明年節目巡禮,宣佈姜濤已有兩劇揸手。

肥仔最得人心

《蘋果》於決賽前夕,請來姜濤、龍志權、Jeremy、Anson Kong、Ian及Edan等《造星》六子接受專訪,想不到,大熱的姜濤、Ian及Anson卻表示信心只得一半,問到他們心目中的冠軍心水,六子中最多人揀肥仔,其次才是姜濤和Ian。姜濤說:「睇好Ian、龍志權同肥仔,我覺得Ian唱歌最好聽,龍志權同肥仔係好特別嘅存在;我對自己嘅信心都係一半一半,因為唔知自己會發揮成點。」Jeremy表示自己信心只有40%,龍志權係10%,Edan最冇信心,只得1%。
問Edan及Jeremy是否覺得自己是陪跑分子?Jeremy說:「從來都唔覺得自己陪跑,喺一個節目入面,有個人突出係佢嘅本事,唔代表我係陪跑,每個人都有每個人特色,而且呢個節目,冠軍只有一個,如果咁講,其餘98個都係陪跑。」Edan就說:「如果以贏唔贏嚟講,可能係有少少陪跑,如果目光放遠啲,我哋已經拎咗想要嘅嘢。」

相關新聞:釗峰畀面幫Lokman拉票

為參賽而犧牲

各參賽者在這段日子接受不同的演藝課程,早前十強更遠赴美國參加短期集訓,Anson卻認為有些不開心:「喺呢個月,我哋拍咗好多嘢,包括我哋上堂,老師點樣教我哋,鏡頭後都拍咗好多嘢,但因為節目時間所限,好多嘢都剪唔到出嚟,所以有好多嘢好容易被觀眾誤解咗,呢個係有少少唔開心嘅地方。」
其實不少參賽者為參選而辭去工作,這幾個月不單零收入,更重要是犧牲陪家人的時間。Ian話:「陪屋企人嘅時間係少咗好多,例如朝早出去,夜晚返到屋企已經係凌晨,呢幾個月冇乜時間同屋企人傾偈,或者一齊食餐飯。」
搞鬼的龍志權說:「除咗少咗時間陪屋企人,仲有犧牲咗休息時間,我對眼本身冇咁耷,𠵱家越嚟越耷。」不過對於姜濤來說,今次參加《造星》最大得着,是令他認清楚誰是真心朋友,姜濤說:「有啲以為係朋友,我冇諗過佢哋會係攻擊我嘅一分子,佢哋話私下識我,跟住話我以前對佢哋做咗某啲嘢,佢哋就會拎出嚟講番,睇清楚好多人,不過都係好事,凡事有兩面睇。」
姜濤已累積了不少fans,會否令女性朋友不敢埋身?他說:「就算我阿媽都唔敢同我行街,佢驚有人認到我,佢喺隔籬會唔好意思,可能同好多人嘅相處方式都變咗。」姜濤認同要在娛圈生存,就要努力去適應。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載