蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月15日
馬上成為壹會員

【娛樂人物】
「每次話我Sexy,個心都唔舒服」
44歲孫佳君花樽平反

大家對孫佳君的印象,或許仍是擺脫不了她跟星爺及羅兆輝的緋聞。性感有罪,孫佳君95年在首部電影《百變星君》已經大晒三點式,對於自己被視為九十年代性感icon,孫佳君原來頗為反感,她接受《蘋果》訪問時表示:「每次聽到個心都唔係好舒服,其實唔係刻意去行sexy嘅路線。」身份已是兩子之母的孫佳君,決心不再成為「花樽」,誓要跟性感劃清界線。
採訪:唐琛悠
攝影:陳俊強

相關新聞:【選美入行】脷叠脷羅兆輝最轟動

現年44歲的孫佳君,在03年淡出影壇後,與富商劉貴喬共賦同居;13年她復出拍戲,身份已變成一名育有兩名兒子的未婚母親。回想孫佳君第一次拍電影,就是在星爺電影《百變星君》大晒三點式,《百變星君》不但是她的成名作,更因而令她成為九十年代性感標誌。對不少女星來說,這是一個夢幻的開局,但孫佳君來說,卻不是這樣。孫佳君日前接受《蘋果》訪問,她直言對「性感」兩個字頗為反感:「其實我真係好想問,我都唔係好性感,只係得第一套電影係着咗三點式啫,可能係第一套電影定咗型,每次聽到個心都唔係好舒服,其實我自己都唔係刻意揀去行好sexy嘅路線,我都唔知點解。」

80歲再性感

孫佳君表示當年拍《百變星君》,是去到拍攝場地才知要穿三點式,而初來香港的她,亦不知香港女星當年很少如此暴露。她苦笑說:「着泳衣係劇情需要,只係一套戲服,唔知到80歲會唔會仲覺得我係性感?如果咁都幾好喎,咁到嗰陣就再着多一次出嚟,畀大家比較吓。」孫佳君現已經成為人母,她認為這個身份反為她帶來出路:「當然我嘅年紀又大咗啲,但係對我嚟講會有多啲真係做戲嘅角色,以前係比較花樽類型。」
那麼當年孫佳君是否因為角色局限,最後索性淡出?孫佳君否認,她坦言當年已經29歲自覺年紀不輕。「嗰年因為沙士好多製作公司都冇咗,基本上啲人都唔出街,喺嗰時開始冇拍嘢,人到咗某一個年紀,不如去嘗試有小朋友,女演員喺呢方面係比較難把握,好多都係拍到嗰個年紀,有番啲成績,就要選擇係咪要結婚生仔。」最後孫佳君選擇跟前男友生了兩名兒子,雖然現在要獨力撫養兩子,但她並不後悔:「𠵱家出嚟仲好,因為好多嘢已經安排好晒,我可以有多啲時間同專注力喺工作方面。」

相關新聞:【蘋聞重溫】梁洛施為李澤楷誕三子

做媽咪好攰

雖說很多事都已有安排,但家庭對於孫佳君來說,依然十分重要:「做媽咪其實好攰,好似呢排轉天氣塊面又生晒粒粒,不過都唔得閒搞,因為要抽時間陪囝囝。呢啲咪係生活,做咗媽咪之後,學識點樣去犧牲,好大嘅一個領悟,係有回報。」單身母親不易為,但孫佳君卻樂在其中:「我好享受𠵱家嘅生活,小朋友大得好快,呢啲時間追唔番,當佢哋大個咗,同人話童年好開心,已經好滿足。」
孫佳君中途離開了娛圈十年,但她的心態其實未嘗離開過娛圈一天:「早幾年嘅生活注重喺小朋友度,不過我又冇真正離開過,成日覺得自己會再返嚟,雖然做緊嗰陣唔係覺得自己好有嗰份熱倩,直到離開咗之後先發覺自己好鍾意做戲。」最後有朋友知道她依然很喜歡演戲,於是鼓勵她重投影圈:「聽完朋友咁講,第二日即刻打畀楊生(楊受成),佢好快就應承咗,好開心可以重返演藝事業。」

做普通人難

孫佳君近年拍了不少電影,角色上亦作出了不少新嘗試,就像她最近在電影《無雙》的演出就罕見她cool爆的一面。孫佳君說:「我喺套戲係冇乜對白,成日跟住發哥或者城城,做啲日常生活嘅動作。初初都有啲擔心,始終做一個普通人係有難度,唔知點樣突出個角色,事前都有問過導演想點做,佢只係叫我要cool到爆就得。」結果不少朋友讚她做得好,孫佳君認真地說:「好多謝佢哋畀呢個機會我同兩個超級影帝合作,每一日都緊張,但係亦學到好多嘢,真係好有滿足感,我希望將來可以演出多啲唔同角色。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載