› 選擇地區
三藩市
紐約
洛杉磯
其他美國地區
香港 台灣 北美
 
2018年10月22日

【娛樂人物】
郭政鴻離巢 情人的抉擇

無綫前綠葉郭政鴻在電視圈打滾三十年,忠心效力同一公司,數年前決心離巢外闖,在內地拍劇,比起以前日捱夜捱工作量,現處於「優差」階段,換來的是收入比以前豐厚,多了時間照顧家庭及一對寶貝女,找到真正生活,亦有充裕時間鍛煉體格操弗身體,體驗年過半百跳出安全區也找到安逸生活。
採訪:卓寶花
攝影:沈健程

相關新聞:內地觀眾愛港味

現年53歲的郭政鴻在無綫效力近30年,幾年前離巢外闖,人過50走出安全區,郭政鴻認為踏出這一步絕對正確,單計收入與時間已經賺回來,可以多點時間照顧家庭,照顧兩位小情人、九歲大女郭倩欣(Kaley)及七歲幼女郭詠之(Ashley)。他日前受訪時說,找到真正生活:「相對輕鬆咗,舊公司一部接一部,反而出面一年拍一兩部,多咗時間陪屋企,小朋友仲細,如果要長時間拍嘢會錯過好多,生活開心咗,見識多咗,有時間做自己嘢,又可以鍛煉身體,細個時學武術,入咗無綫後只係拍劇,冇時間練習,近年有番自己,真真正正係一個生活。」

重拾家庭樂

郭政鴻表示離巢感覺似小朋友變成已婚男人:「去到樽頸位要改變,再行落去難以見識出面世界,地球都係圓,好多同事兜個圈又返去,好多同事都離開,近年不斷換血,好多相熟監製同事都相繼離開呢個平台,又多新人上緊嚟,我覺得係時候出去見識吓,唔通過多十年先出去咩。」

對於這幾年外闖,郭政鴻稱很滿意工作及作息狀態,勝在商演多搵快錢,他坦白說:「喺無綫就難有呢個機會,拍劇lock晒期,以劇組為重,全世界要就劇組時間,我哋冇可能搵到所謂外快。自己唔少劇集喺內地播,有少少基礎,知名度算高,去到多數係周年晚宴,同嘉賓影相簽名,唱幾首歌,工作範疇就係咁多,你話係咪優差,同拍劇日曬雨淋三十幾度,唔好話着古裝,叫你着西裝戶外企一日拍外景,香港夏天三十度你知乜嘢味道,唔好講室內工作量或講對白,你企喺度都暈得一陣陣。」

轉戰拍網劇

近日郭政鴻有份參與張智霖、王陽明及薛凱琪主演《蝕日風暴》網劇播出,在劇中飾演他擅長的警察角色。談到轉戰拍網劇,合作班底及台前幕後都是舊同事,監製是無綫前高層梁家樹(Tommy),郭政鴻坦言拍攝氣氛有所不同:「出面拍攝資源多啲,香港同內地合拍,網劇題材可以更大膽,去得更盡,資源夠又可認真啲。」提到倒戈無綫,會不會怕得失舊公司,他笑言:「拍咗啲劇無綫都有買番嚟播,天下無不散之筵席。」
場地提供:The One鐵板燒海賀

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載