› 選擇地區
三藩市
紐約
洛杉磯
其他美國地區
香港 台灣 北美
 
2018年10月30日

【馮仁昭四圍超】
《無雙》跑出15億票房
發哥開戲 再拍莊文強

周潤發、郭富城、張靜初、馮文娟、廖壠智同導演莊文強等噚晚喺銅鑼灣出席電影《無雙》慶功宴,截至前日,香港票房已經累計超過3,100萬,內地上映30日票房過咗12億人民幣,全球票房超過15億。慶功宴上,大會就準備一張面額15億元嘅巨型大鈔,畀發哥同城城簽名加持。發哥話:「導演細細個已經迷戀我,佢細個屋企開戲院,睇咗我成100次,發嫂叫佢唔好行咁埋,鍾意就得,唔好掂我。」

發哥受訪時話開心到幾晚瞓唔着,仲話劇本係莊文強編劇十年嘅努力,又話票房唔係靠演技,係靠跑返嚟,發哥話:「東跑跑,西跑跑,大媽跟我跑。去宣傳好似跑山咁,跑陽明山、飛鵝山、奧運村。就嚟變香港阿甘。」

城城每年影全家福

問到發哥會唔會唞吓,佢話:「太太推得我好急,12月會再開戲,都係莊文強編劇,其他之後再講。」至於莊文強就話:「個古仔其實係發霉腐乳,票房我唔識估,內地票房好奇怪,有新戲上時,我都排第二。」至於會唔會拍續集或者前傳,導演話要先搞發霉劇本,但好大機會原班人馬再合作。

上周五53歲嘅郭富城,講到生日願望:「生日願望身體健康,拍更多更好嘅電影畀大家,要多啲突破。」提到日前罕有發放全家福,城城話:「結婚有咗小朋友,家庭聚會比朋友聚會更多,好樂意每年影全家福。成家立室之後,去到人生另一階段,工作比以前更有動力,想做得更好,更專注冇雜念,成長過程係一個好嘅上天安排。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載