› 選擇地區
三藩市
紐約
洛杉磯
其他美國地區
香港 台灣 北美
 
2018年11月01日

五段戀情都被飛
82歲謝賢一生瀟灑 最怕見白頭

【娛樂人物】謝賢(四哥)縱橫娛樂圈66年,日前接受本報專訪,坦言一生五段戀情都是被飛的一方。被問戀情的死因時,四哥說得最多的是:「我衰鍾意玩。」說得輕鬆,也許是他舉重若輕,令他最感恩的不是兒子是大明星,反而是82歲的他擁有一頭烏黑秀髮,可以繼續型下去。

採訪:余燕儀
攝影:仇志德

相關新聞:霆鋒未帶王菲見家長

謝賢早前在觀塘接受專訪,見他單手插袋、腰骨挺直型爆現身,更難得的是82歲高齡依然一頭黑髮,四哥說:「呢個真係多謝老天,同我一齊長大嘅人,有啲甩晒,有啲甩一半,有啲白咗,但我真係算好彩。」問到四哥keep fit之道,現在體重130多磅的他說:「成日去行山,起身做吓push up,朝早肚餓咪食碗麵,總之唔好食得過份。」希望長命百歲嗎?四哥的回答瀟灑到裂:「千祈唔好,長命百歲收尾嗰幾年難頂,瞓喺度等人嚟探我,『吓!邊個呀?哦!』咁咪弊!」

「我好專一」

四哥16歲入行,因高大靚仔專拍愛情片,被封為「風流小生」。對於這個稱號,四哥大呼冤枉:「我好專一,一生人到今日為止,得五個女朋友!」說時舉起三隻手指發誓。不過人年紀大了,記憶難免模糊,叫他細數情史,他帶點猶豫反問:「第一個係咪甄珍呀?」

其實四哥首位女友是嘉玲,他說:「嗰陣我哋一間公司,因為相處得耐有感情,個個認為我哋拍拖,我亦都接受,但我衰鍾意玩,有時出去打枱波、打牌,丟低佢。」對於分手一刻,四哥倒是記得很清楚,「後來佢撞到一個泰國仔,忽然同我講佢要結婚,我話你咪嫁囉,要結婚先話我知,唔要得落啦,佢哋結婚我都有去。」

之後四哥與蕭芳芳拍拖一年多,四哥歸咎兩人性格不合:「拍拖之後,覺得呢個女仔好好、好乖,鍾意讀書,佢叫我得閒讀多啲書,我話『玩都唔夠時間,你叫我去讀書!』咁之後,佢話『既然你咁,都唔係我需要嘅人,我哋就拜拜!』自己都覺得呢個女仔咁乖,而且佢同媽媽相依為命,咁我退出啦,十幾年後,佢有打電話同我傾偈。」

台灣影星甄珍是四哥首任妻子,四哥直言兩人離婚後沒來往:「上次佢嚟香港拍自傳,我係佢第一個情人同老公,佢搵我拍咗兩張相,好耐冇見佢啦。」 當年甄珍移情劉家昌,有傳對四哥傷害甚深,四哥淡然回應:「我唔記得咗啦,傷我乜嘢?」更反為舊情人講好說話:「我叫啲朋友嚟打牌,佢(甄珍)又戇居居喺房,整整吓佢無聊,當佢識到一個木木獨獨又幾靚仔咪變心。」

相關新聞:【舊愛去向】狄波拉改嫁三人行

「五個都愛」

大家熟悉的狄波拉是四哥第四位女友,亦是第二任妻子。四哥愛拉姑持家有道,他笑說:「我成日掛住玩,拉姑好識做家務同照顧男人,我乜都唔使做,佢照顧晒,有時我打牌打到天光,又係衰我囉,總之呢個係上天安排。」上海姑娘CoCo是四哥第五位女友,兩人拍拖十三年,不過最後都分手。

問四哥最愛是誰?四哥說:「五個都愛,分開咗依然係朋友,我最安心,佢哋啲男朋友同我都係好朋友。」現在單身的日子會否好悶?四哥說:「冇咪冇囉,𠵱家已經唔同咗,上咗年紀好似我𠵱家咁嘅生活,對女人冇乜好大嘅心,朋友最緊要。一個人住咗幾十年,𠵱家你叫我娶老婆,我死畀你睇,可能咋!」
場地提供:Table 18@apm

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載