› 選擇地區
三藩市
紐約
洛杉磯
其他美國地區
香港 台灣 北美
 
2018年11月08日

斥製作人抽水「最怕的演員」
秋生護藍潔瑛:欺負人到幾時

黃秋生昨日為藍潔瑛抱不平,扯火鬧台灣製作人周遊欺人太甚。

黃秋生昨日在油塘拍攝ViuTV新劇《理想國》,近日先後有多位社會及娛樂圈舉足輕重的人物離世,秋生說:「我都有留意,不過我只係睇過金庸嘅小說,以前喺嘉禾,只係行過見過吓鄒生(鄒文懷)。」不過提到藍潔瑛,秋生表示本身不認識她,但有一件事實在不吐不快!

未收錢唔開工

日前台灣製作人周遊聲稱當年拍攝台劇《半生緣一世情》時,藍潔瑛是她最怕的演員,秋生坦言忍不住要為藍潔瑛發聲:「有個製作人出嚟抽人水,狂數人哋以前收工後要返酒店。收工唔返酒店,唔通喺現場瞓咩?收工大霧,要人喺車前指路,咁即係話酒店好近,如果返酒店兩個鐘頭車,唔通嗰個人喺前面指路兩個鐘咩?酒店咁近,點解唔可以返酒店?點解喺你間房度瞓?」

秋生續說:「你話佢(周遊)係咪儍儍哋?又話人哋未收錢唔開工,未收錢梗係唔開工喇!你都黐線!茶餐廳咩!食完先畀錢?呢啲人衰格到不得了!」秋生直言死者已矣,為何還要借死者抽水?他亦說︰「仲要咁欺負人到幾時,應該要有同情心,仲講埋呢啲嘢,仲要唔係道理。」

自嘲退役影帝

提到今次演出《理想國》,秋生說:「幾得意,一個人做晒,舞龍舞鳳得自己,喺監獄入面,題材又得意有趣,本來仲叫我做多個單元,我睇過劇本唔啱我,太後生仲要同個靚女做,愛情戲唔識做,我驚觀眾唔夠三分鐘熄機。」不過秋生本身是影帝級人馬,他再說:「我好耐冇做影帝,我呢啲退役啦,影帝,掉晒去堆填區!」再問他會否希望再攞影帝?他說:「唔好喇,畀吓啲新人,郭富城嗰啲新晉影帝,如果我出嚟,畀我又唔係,唔畀我又情何以堪呢,算啦。」

此外,秋生前晚在金鐘出席「香港亞洲電影節2018開幕禮」,秋生主演的《淪落人》是今屆開幕電影之一,飾演傷健人士的他說:「拍嗰陣唔辛苦,但一坐上輪椅,感受到佢哋嘅苦況,冇尊嚴,又郁唔到,大小二便都…… 唉,總之諗起都驚。」
採訪:黃曉妍、羅慧敏
攝影:林賓尼

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載