蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月09日

自爆曾訂婚兩次 結婚兩月閃離
蕭芳芳遭母吞學費毀夢 呻苦痛哭

119,193

蕭芳芳前晚到香港大學接受錄影訪問,談到於70年放下如日方中的事業到美國讀書,想不到她竟自爆在大學三年內兩度訂婚:「兩次都冇結成婚,最終取消婚約。」返港拍戲後更結埋婚,不夠兩個月便離婚收場。自細恨讀大學的芳芳姐,辛苦儲夠學費後,到美國準備返學時,其母卻指做生意被呃錢,要芳芳姐寄回學費給她,芳芳姐談到此更感觸落淚。

影后蕭芳芳前晚到香港大學接受港台節目《大學問:70+1》錄影訪問,今次亦是她受耳患困擾後,首度接受電視台訪問,全場觀眾爆滿。席間芳芳姐有問必答,被問及大學生涯中有甚麼得着,芳芳姐自爆:「喺三年大學生活入面,試過兩次訂婚!」此話一出全場譁然,芳芳姐補充:「兩次都冇結成婚,最終取消婚約,兩次結束了愛情,但係復活了生命。」芳芳姐透露第一個未婚夫是中國人,性格比較大男人;第二個則是外國人。

其實芳芳姐早於13歲時,已決意到外國讀書,她當時找英文補習老師為她寫信,申請入讀英國皇家戲劇藝術學院,可惜被拒。到15歲那年,蕭媽媽叫芳芳姐到星馬登台,表示之後就讓她於洋,不過登台後仍不夠學費,令她第二次留學夢碎。到芳芳姐儲夠學費,她已是超級紅星,只有三個人支持她留學,芳芳姐說:「其中一個反對嘅,係我初戀情人,仲同佢反埋面。去到美國準備返學時,媽咪打電話嚟話『同人合作做生意,畀人呃咗啲錢。』媽咪話想我寄啲學費畀佢,當時睇住一步之遙嘅夢想,喺面前崩裂咗,覺得好辛苦。」

八叔伸援手

幸好當時名伶「八叔」譚秉庸得悉此事後,為芳芳姐交學費,實現她讀大學的夢想。芳芳姐回憶至此不禁落淚,一度哽咽需要暫停。講座後,芳芳姐談及八叔,仍很感觸:「八叔係一個德高望重嘅名伶,比仙姐(白雪仙)、任姐(任劍輝)仲要早一輩。當年佢借學費畀我,後來還番俾佢,佢都有收番。」八叔除了在財政上對芳芳姐施以援手,就連登台他都有幫忙:「喺美國嗰段日子,佢好照顧我,有次登台,有啲黑社會喺戲院攞晒我啲相,八叔知道之後即刻搵人出嚟傾,第二日啲相就返嚟,黐番晒上去。」

年少曾啪丸

芳芳姐又表示,在上機赴美讀大學前,蕭媽媽已跟她說:「美國小朋友出門口時,媽咪會派避孕套畀小朋友。」不過芳芳姐就解釋:「其實媽咪想講性教育,避孕套嘅嘢諗都唔好諗,唔好亂嚟。」芳芳姐感覺留美時自由,不諱言曾少年輕狂:「試過同同學食迷幻丸,不過自己冇反應。」

大學畢業返港後,芳芳姐未幾出嫁:「當年係諗住返去美國讀碩士,但因為媽咪身體唔好,咁就留喺度,繼續拍戲,咁有錢咪賺囉,點知拍拍吓仲結埋婚,點知兩個月唔夠就離咗婚,之後又繼續再拍戲喇。」其實蕭芳芳在75年嫁給秦祥林,後在77年分居,78年兩人正式離婚。

不過問到初戀情人是否四哥謝賢,她就大賣關子:「呢個我就唔答得喇,你哋自己估,你哋求其寫啦。」據上周本報的四哥訪問,四哥坦言芳芳姐鍾意讀書,而他則認為「玩都唔夠時間,你叫我去讀書!」於是分手,跟芳芳姐形容的「初戀情人」大致脗合。
採訪:馬建華
攝影:沈健程

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載