› 選擇地區
三藩市
紐約
洛杉磯
其他美國地區
香港 台灣 北美
 
2018年11月14日

【娛樂人物】衝擊金馬女配
惠英紅揭自私面孔

獲獎無數的惠英紅早前受訪時直言,最想挑戰演喜劇。

惠英紅去年憑電影《血觀音》摘下台灣金馬獎影后,今年再憑電影《翠絲》提名金馬女配角,紅姐信心十足,她在戲中扮演跨性別人士姜皓文(黑仔)的保守妻子,坦言是個自私又愛面子的女人,紅姐演得淋漓盡致。問到紅姐還想有甚麼挑戰,她竟想演喜劇,測試自己笑點。

相關新聞:挾影后呼聲高

台灣金馬獎將於大後日舉行,惠英紅憑電影《翠絲》第四次提名金馬獎女配角,她日前在銅鑼灣受訪,紅姐大講賽前心情:「其實我有啲驚,對手都好過我,太強,我參加就OK。好多人問點解唔報女主角,因為戲份唔夠,只係集中幾場戲,攤長睇可能戲份唔夠,但係女配角就會重點咁睇你演出,𠵱家報女配角chance大啲。」

想嗒變性人

在《翠絲》中,對手姜皓文扮演跨性別人士,紅姐說:「佢外形太man,啲肌肉令你有阻礙,真實嘅變性人要吸收大量荷爾蒙,係會燃燒肌肉,佢(黑仔)個身體係硬嘅,但佢真係做得好好。」紅姐自爆23歲時,曾見過十幾個變性人,其中一個更靚爆,她說:「好似余安安,佢連把聲都變埋,胸都會生出嚟。黑仔喺蘭桂坊嗰場,嗰種姣、媚,真係會令你想嗒咗佢,我都做唔到。」

在戲中紅姐扮黑仔老婆,她形容角色性格保守:「佢唱大戲,而且同黑仔係屬於盲婚啞嫁,好萌塞,又要面子,其實佢係個自私自利嘅人,所以點會接受到老公變咗姊妹,就算一直無夫妻之實,佢都係詐詐諦諦離婚就算,叫個男人去遠啲,為咗保全面子。」紅姐演出前已很了解角色,演來充滿信心:「我唔覺得好大壓力,舒生(編劇舒琪)同我講嘅時候,我就知道唔會差得去邊。」

香港多悲劇

紅姐自爆有一場要挑逗黑仔,可是最終難逃一剪:「唔係好激嘅,我拖吓佢手,佢甩開我,然後我就覺得:『噢,今晚又搞唔到。』嗰種,其實描述夫妻嘅篇幅唔係好多,最後剪走咗,我諗係唔想講得太白。」影后級的紅姐演戲上還會有甚麼挑戰?她笑言:「唔知呀,其實我覺得最難係拍喜劇,個個笑點唔同,香港都係君如先有嗰種魅力。呢十年都冇人搵我拍喜劇,社會氣氛都唔好笑,自然拍都冇心情,如果嗰個地方成日拍悲劇,個社會一定有問題。」

採訪、攝影:盧妹
場地提供:香港銅鑼灣皇冠假日酒店

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載