› 選擇地區
三藩市
紐約
洛杉磯
其他美國地區
香港 台灣 北美
 
2018年11月16日

【add名人時尚】栢天男風暴,準備!

【add人物】近年總是說香港影壇演員青黃不接,看到的總是差不多的面孔,今年栢天男(Adam Pak)憑着《L風暴》的反派角色,吸引了觀眾的視線,加上亮眼的外形,立即引起不少關注。有人認為留鬚的他,與日本90年代男神竹野內豐有點相像,也有人形容他是翻版金城武,無論像誰都好,重要是香港影壇多了個新帥哥。
撰文:陳蔚渝
攝影:周樂恒

栢天男是澳洲土生土長的華人,來香港發展前,他的廣東話是「有限公司」,甚少機會接觸香港文化,「以前冇機會學嘅嘢,𠵱家要好快學晒,所以係好好嘅自我增值機會。」來港幾年,廣東話進步不少,但仍然係識講唔識睇,劇本要花時間拼音再消化,加上第一次拍戲便與古天樂、張智霖等前輩合作,令他壓力更大,「除咗要明白劇本,仲要講到個情緒出嚟,我記得有場戲要講好多諺語,我講極都講唔到,第一會喺現場飛紙仔,第二就係NG咗好多次,我好責怪自己,導演不斷叫我放鬆,佢話:『你得嘅』,畀咗好多支持同鼓勵我。」訪問期間,經理人也忍不住出口糾正Adam的廣東話。

起步不太遲

Adam又分享因為廣東話,工作時經常鬧出笑話,令人誤解他的意思,「試過有次喺澳門拍嘢,有個演員揀衫買嘢,我問『呢件會唔會涼親?』然後佢O嘴,笑我輩份好似唔係好啱喎,之後導演解釋番,我先知發生乜嘢事。」

本身修讀藝術的Adam,對電影創作這樣形容,「我覺得𠵱家係向緊另一個方向發展夢想,比以前其實更加具創作性,有更多可表達空間,所以係一個正面向前邁進嘅新方向。」在這個「成名要趁早」的年代,問到Adam在三十六歲才參演第一部電影,會否擔心自己起步太遲時,他說:「好多人都問過呢個問題,我覺得timing啱啱好,如果我早啲去做,都未必有𠵱家嘅發展,好多嘢都講緣份,又想學講廣東話,又嚟到香港,暫時嚟講everything is perfect。」

由於經驗尚淺,Adam說只要有機會任何角色都是挑戰,談到最想合作的對象,「梁朝偉嘅眼神真係好迷人,男同女都會俾佢迷到,呢方面真係想跟佢學習。」他又說希望將來擁有更多演出經驗,演技更成熟時,可以站在舞台,有機會成為一位舞台劇演員。

狂操要爆肌

最近因為新角色需要,Adam不斷操弗自己,他認為運動最重要是說到做到,「鍾意做運動同準備自己,其實完全係兩件事,𠵱家係集中訓練,教練push得好緊要,但我鍾意嘅,我鍾意挑戰。」問到是否因為角色需要「爆肌」,他笑說:「冇錯,就係要乾、 爆肌、大隻,總之就係香港好流行嗰隻,我就係要嗰隻喇。」既有高顏值,又有迷人眼神,再加上健碩身材,相信Adam要成為新一代男神,其實不難。
化妝:Circle Chong of Annie G. Chan Makeup
髮型:Zenki Lau of La Mod Salon
服裝提供:Fendi、Salvatore Ferragamo、Diesel、Emporio Armani、JW Anderson
場地提供:Eliment Fitlax

男模入行

栢天男在澳洲出生,於新南威爾斯大學修讀藝術與設計系,畢業後曾經在阿姆斯特丹從事藝術工作,2011年來到香港發展並當起模特兒,曾與劉心悠合作拍攝嫁喜禮餅廣告,令大家留下印象。

早前簽約黃百鳴旗下的電影公司成為藝人,準備在影圈大展拳腳,《L風暴》是他的電影處男作。

自我了解型

訪問中與栢天男來個快問快答,看他的原始個性,他對自己想要的,毫無懸念,更深諳男人不壞,女人不愛道理,但溫柔一面,他原來也是貓奴。

add:a 栢天男:栢
a:有鬚VS冇鬚
栢:當然係有鬚啦
a:拍戲VS拍廣告
栢:拍戲
a:暖男VS壞男人
栢:當然係壞男人
a:理性VS感性
栢:感性
a:肌肉型VS鋼條型
栢:鋼條型
a:犬系VS貓系
栢:兩個都好鍾意,二選一就一定揀貓。

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載