› 選擇地區
三藩市
紐約
洛杉磯
其他美國地區
香港 台灣 北美
 
2018年11月16日

【姐匙Talk】小花黐雀哥扮上菜

幾時都話近朱者赤近墨者黑,做朋友好,做夫妻都好,總係有啲嘢要啱嘴形先可以connect到!好似以膠面見稱嘅「雀哥」,佢嘅人緣有幾好,好多人都耍手兼擰頭!

唔熟唔答感情事

查實咁入行咁多年,最多人講嘅雀哥,唔係佢做嘢有幾好,演技有幾咁出色,而係佢平時做人嘅態度,無論行內人點樣講佢,雀哥覺得啲人有妄想症,妄想人哋妒忌佢,甚至係利用緊佢,消費佢嘅名氣,又或者嗰啲幫佢做嘢嘅人,只要佢覺得你唔盡心盡力幫佢,有少少嘢唔係咁啱心水,雀哥都會毫不留情咁鏟到你上天,聽講啲說話仲去到好盡,幾刻薄㖭。

雀哥雖然人緣唔多好,圈中朋友亦冇乜幾個,不過冤豬頭都有萌鼻菩薩,好似俾人撞破佢同「小花」拍拖,雀哥最初喺人前人後都唔肯認,但係隔咗冇耐,出嚟嗰陣又會好不經意咁提起小花,但又講啲唔講啲,懶係神秘咁。相反升咗呢嘅小花,亦因為掛咗「雀嫂」個名,由本來只係路人甲乙丙,之後出席活動都博到有個相位仔。有一次小花接咗個活動,當然少不免被問感情嘢,但佢竟然即刻話:「同你熟啲先講啦!」搞到成班傳媒O晒嘴,結果梗係冇乜人想同佢熟,如非必要都唔想打攪佢哋。

撰文:Jessie
本欄逢周五刊登

姐匙Talk

我姐匙縱橫歌影視幕後,咁多年嚟冷眼旁觀,娛樂圈大小事都走唔過我雙眼,真係頂唔順要爆啦!歡迎大家嚟剝花生。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載