› 選擇地區
三藩市
紐約
洛杉磯
其他美國地區
香港 台灣 北美
 
2018年11月16日

憶念詞神林振強
潘源良:佢將社會不平轉化成創作

「Well Friends別要替我灑淚兒,彼此都不捨 但世上永有分別時」——《Miss You Much》作詞:林振強

「鬼才詞神」林振強妙筆生花,精於天馬行空帶出歌詞主題,惟03年11月16日,林振強因淋巴癌於瑪麗醫院病逝,終年56歲,天妒英才!其生前無所不談的好友潘源良,還說林振強見到社會不平的,都會轉化成創作一部份。

相關新聞:【妙筆金句】靈感同乳溝

悠長十五年過去,近年廣東歌地位低落,林振強的詞作卻永垂不朽,跟他相識一場的朋友,念念不忘這位才華傲絕的天才詞人;1984年的流行曲創作大賽上,林振強憑《空櫈》獲冠軍,潘源良雖然輸了,但兩人卻惺惺相惜;今天,潘源良仍深深懷念故友,日前潘源良在尖沙嘴接受訪問時說:「輸畀林振強無話可說,嗰次第一次見,佢走嚟搵我,我仲記得好清楚,佢話好鍾意我寫嘅嘢,其實當時我只係寫過林子祥《邁步向前》、泰迪羅賓《天外人》,我嘅事業啱啱起步,林振強寫咗幾年,作品好流行,香港寫詞人一個奇才,佢話鍾意我寫嘅嘢,我覺得好開心,難得有個好似哥哥嘅人幫我打氣。」

接龍合寫《車站》

兩人成為好友後,有空就相約飲咖啡,潘源良很欣賞這位天才橫溢的朋友:「佢嘅作品柔情又有,貪玩又有,男女感覺又有,天馬行空從另一角度講生命又有。」林振強是個寡言的人,但在創作上卻帶出無限色彩,對樂壇影響巨大,潘源良坦言:「的確喺佢之前,對廣東歌處理歌詞上冇咁現代化,冇咁鬼馬活潑,佢會用好多唔同表達方法,甚至詞語,故意加啲英文,舉例如葉蒨文《200度》,裏面有英文,拉埋感情,原來廣東歌可以消化英文,呢啲係佢帶畀廣東歌特別嘅地方,後來大家覺得可以發揚光大。」兩人更曾合作填詞夏韶聲《車站》,潘源良將手稿保留至今:「好似接龍咁寫,嗰時fax年代,過程難得同開心,最後佢由頭到尾跟一次,半夜兩三點完成版本,佢fax過嚟後,話自己冇電要瞓。」

相關新聞:倫永亮:唱佢歌好順口

好直不發脾氣

至於林振強的為人,潘源良更大讚:「佢好好,從來唔會轉彎抹角,睇佢《洋葱頭》漫畫都知,對於佢認為需要珍惜嘅好珍惜,認為要表達提醒嘅都盡力做。我哋無所不談,都係屬於唔係好識發脾氣嘅人,見到社會不平將佢轉化成創作一部份,佢更加多途徑,又寫文章又畫卡通又寫歌詞,有乜見解都用呢種方法表達。」

事業如日中天的林振強,01年不幸被癌魔纏身!潘源良憶說:「嗰年盧國沾老師攞CASH終身成就大獎,我哋都有參加周年晚宴,因為嗰段時間林振強有時唔喺香港,四圍飛來飛去工作或陪屋企人,嗰次我哋喺晚宴見面,臨走我同林振強講:『你係咪jet lag好緊要,見你唔係好精神,你休息多啲喎,面色唔係幾好。』佢話:『好吖,冇嘢,睇吓幾時得閒又飲咖啡。』大約一星期後,約11月中,佢打電話同我講,佢話發現咗少少cancer嘅可能性,正在化驗同處理緊,佢覺得我好關心佢,咁都睇到佢唔舒服,所以唔應該隱瞞,佢話呢樣嘢唔想畀人知。」

約定再飲咖啡

03年,林振強最終敵不過癌魔,走了!今年,其胞姊才女林燕妮也因肺癌離世,林氏四姊弟都因癌症先後離世,潘源良感嘆說:「喺佢喪禮上同林燕妮碰面,大家有點頭。當然呢個(林燕妮和林振強離世)係香港好大損失,我都成日想像,如果佢哋仍然喺度,好多事情大家可以商量吓,聽吓佢哋意見、想法,但人就係咁,我哋咁嘅年紀要接受生老病死係常態,佢個妹同細佬我唔熟,只係講林燕妮同林振強,佢哋本身喺香港貢獻好多精采創作、想法、意見,我覺得佢哋人生好與別不同。」

最後,有甚麼想跟天上的林振強說呢?潘源良說:「好掛住佢,我好掛住佢,其他遲吓有機會飲咖啡先傾!」

採訪:余燕儀
攝影:林德雄
場地提供:The AIR(The ONE)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載