› 選擇地區
三藩市
紐約
洛杉磯
其他美國地區
香港 台灣 北美
 
2018年11月27日

【電影人物】攻銀幕 鄭嘉穎大師Channel

將為人父的鄭嘉穎自從離開電視台後,積極進軍電影市場,下月有新片《葉問外傳:張天志》上映。嘉穎自問拍過不少動作戲,但今次是首次見識到武指袁和平(八爺)的功架,他說:「我以前嗰啲都係花拳繡腿。」

鄭嘉穎今年8月在峇里島迎娶陳凱琳,新婚三個月,即宣佈太太懷有身孕。家庭幸福,事業方面亦發展理想,他在新片《葉問外傳:張天志》中飾演楊紫瓊的弟弟,家族為管理夜場的社團。

對唔住替身

戲中各演員均是打得之人,只有嘉穎用槍,劇情解釋因自小體弱,所以功夫較遜,嘉穎說:「但戲入面我成日唔記得帶槍,之後就俾人打,俾阿晉(張晉)打。打親八爺要求都好高,要撻得靚,張枱要爛得靚。」嘉穎指好榮幸和八爺合作:「原來大師要求咁高,出嚟點解咁好睇,精雕細琢。佢係個慈祥老人家,成日講笑話『我對文戲每個鏡頭要求都好高』。」

不過一次失誤,令嘉穎對替身腦震盪入院耿耿於懷:「有場戲阿晉要踢我條頸,拍攝時因為要就鏡頭,八爺已經叫我唔好避,但自然反應,好難唔避,我同八爺講我都唔想避,但係隻腳嚟緊,就此一次,踢咗後面,我就去咗睇醫生。而替身就俾阿晉踢後腦,替身硬食,踢完即刻講唔到嘢,送咗去醫院做磁力共振,俾踢到腦震盪,我真係唔好意思。」

嘉穎續說:「本身我唔係動作演員,我拍過好多打戲,但原來今次先真正係打,我以前拍嗰啲都係花拳繡腿。八爺成日問我得唔得,我梗係話咗得先,導演都明白我哋唔係武打出身,都會就住我哋。」

摑腫周秀娜

在首場戲,嘉穎為表達惡霸身份,要用力掌摑周秀娜(Chrissie),拍攝前他對Chrissie認叻,自言摑人很有經驗,有聲又不痛,豈料第一摑八爺不收貨,嘉穎說:「八爺叫我食入啲、大力啲,咁冇辦法,打戲同親熱戲都係越少越好,我同Chrissie講話冇辦法,要食入少少,大力一摑,大家都呆咗。八爺再問有冇打到,全場都話有,八爺話再嚟多次,但係Chrissie話塊面已經腫咗,要敷冰,八爺至肯收貨。」
撰文:張俊銘
攝影:陳俊強

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載