› 選擇地區
三藩市
紐約
洛杉磯
其他美國地區
香港 台灣 北美
 
2018年12月05日

【add人物】賭王未讚過
何超鳳為家族搏殺25年

上周四下午2時半,無敵維港景的信德大樓。
54歲的賭王何鴻燊二房千金何超鳳一邊化妝看文件,一邊吃貼地午餐:36元南瓜湯。今年4月賭王宣佈退休,將澳博主席一職交到超鳳身上,這位掌管着千億賭業的新女掌門人,罕有地打開寫字樓受訪,「係辛苦,多咗嘢做,但我enjoy,我個人怕悶。」如果要在女強人和普通女人之間二選一?她說:「其實我一向都想做個普通人,喺屋企煮吓飯。」

何超鳳極少做專訪,傳媒焦點一向圍繞在大家姐何超瓊或娛圈的何超儀,超鳳可說是最低調的一個,間中會見到她在財經版出現,去年她被爆結束23年婚姻,才登上娛樂版頭條。

「我大大話話幫信德做咗……嗯,到明年1月1日就25年。」超鳳最早幫手睇的家族生意,是何家大本營信德,「我第一份工係喺法國國家巴黎銀行,做咗兩年,其實唔係太辛苦,咁爹哋都召喚咗一段時間,咪返嚟。我係1994年1月1日返工,最先係做財務嘅嘢,辛苦,但好有成功感,慢慢就開始負責地產。」今年4月接掌家族另一旗艦澳博做主席,「做咗澳博兩邊走,多咗嘢做,因為係新挑戰,希望可以跟到爹哋嘅步伐,做得好好哋。」

相關新聞:【add人物】二房姊弟超瓊最靚

賭王爸爸好叻

原來賭王從不明確指點教路,不會手把手教女兒如何營商處事,超鳳說:「跟咗爹哋十幾二十年,做佢夥計,佢係比一般人更叻嘅人,你嘅老闆係好叻嘅人,你自然要打醒十二分精神。」在超鳳眼中,賭王做生意最強是聰明、開通兼與時並進,不斷將新生意加入自己版圖。做夥計、做女兒,人人都想得到認同讚賞,但超鳳指賭王未試過讚她做得好好,「最多聽過佢同啲世叔伯講『我個女都OK』,我諗呢句已經係唔錯㗎喇!」

超鳳和超瓊一直拍住上為賭王打理生意,代表二房在商場廝殺,這位女當家的日常生活又是如何?「朝早7、8點起身,做運動先,急步行一個鐘左右。朝早我唔化妝,唔搽嘢,太懶了。我哋10點開工,平均做到7點,除非有約,lunch喺公司食就快啲。」她坐了逾20年的辦公室充滿愛和人情味,牆上掛着保良局學生畫的水彩畫,枱面放了可愛的Snoopy公仔,還有一幅幅的溫馨家庭相、賀卡等。

愛留家煲港劇

四個秘書、兩部電腦,跟身的兩部iPhone要24小時開,外人眼中超鳳很惡,連秘書助手都不時提醒她出活動要多點笑容,超鳳說:「其實我係一個由細到大都好怕醜嘅人,細個成日講嘢俾老竇鬧,因為我講嘢係越講越細聲。」愛讀書的超鳳擁有何家最高學歷,「我細個嘅夢想係做老師,但爹哋同家姐話我唔夠威嚴。」

工作以外,意想不到是超鳳原來非常貼地,最愛看電視:「我最鍾意睇《愛.回家》,唔使諗呀,又開心又好笑。」周一至周五向前衝衝衝,周六日她會在家睇電視、補眠,閒時做pilates、游水,連shopping都少去,「我唔貪靚,行街係同朋友見吓面、傾吓偈,你可以話我務實型,又可以話我懶。裙最方便,着來着去都係Chanel、Dior、Valentino。」手錶長戴iWatch,超鳳貪其可計步數及紀錄燃燒了幾多卡路里,因為她高中時入田徑隊、游水隊,操練到變大隻妹,現時小心keep fit,長期維持105磅。

相關新聞:【add人物】惡媽但開放

仍然相信愛情

超鳳去年突然爆出和何志堅已於2016年離婚,事隔兩年,她形容心情OK,「反而係𠵱家做人仲專注啲、充實啲。」更坦言依然相信愛情,「相信!點解唔信?愛情呢啲嘢好自然,佢嚟就嚟,唔嚟就係未嚟。」又表示如果要在女強人和普通女人之間二選一,她會選做普通人,留在家煮飯。
撰文:林妙萍
攝影:郭賢興

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載