› 選擇地區
三藩市
紐約
洛杉磯
其他美國地區
香港 台灣 北美
 
2018年12月14日

【姐匙Talk】OK仔開工Hea爆丟架

電視台係最好磨鍊演技嘅地方,以前大台仲開埋藝員訓練班教新人做戲,姐匙就睇住發哥、星爺、華仔由串星做到變巨星。佢哋做新人時人工低,就算捱得幾辛苦都只係呻兩句,心底嗰團對演戲嘅火燒到嘭嘭聲,就算𠵱家做咗巨星,工作態度都係咁專業。

不過𠵱家好多新人真係一蟹不如一蟹,可能時代唔同咗,社會冇以前咁多窮人,好多大學生、有錢仔女都鍾意入娛樂圈追夢。可能佢哋家庭背景好,打份工都係唔憂做,有時工作態度真係唔夠專業!好似「OK仔」咁,生得高大靚仔,身形又夠弗,外形條件真係冇得輸,不過,我姐匙聽電視台啲PA講,OK仔原來好hea㗎!

三催四請

話說OK仔入行已經五年,但最初只係做節目主持,近兩年先有機會拍劇,但都只係做啲閒角,唔係男主角嘅佢開工時成日都要等埋位,真係等多過做,而佢等埋位期間,並唔係企埋一邊睇前輩做戲偷師,而係匿埋一角沉迷打機。可能後生仔真係好鍾意打機,有次PA叫OK仔埋位,佢竟然話:「打埋呢鋪先。」

PA聽到當堂眼都凸埋,OK仔又唔係男主角,憑乜叫全組人等佢呢?佢呢啲咁嘅工作態度,即刻俾PA開咪鬧爆,真係面係人哋畀,架係自己丟!
撰文:Jessie
本欄逢周五刊登

姐匙Talk

我姐匙縱橫歌影視幕後,咁多年嚟冷眼旁觀,娛樂圈大小事都走唔過我雙眼,真係頂唔順要爆啦!歡迎大家嚟剝花生。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載