› 選擇地區
三藩市
紐約
洛杉磯
其他美國地區
香港 台灣 北美
 
2018年12月21日

【馮仁昭四圍超】千嬅世巡 賭夫妻感情

千嬅噚日現身北京,為明年嘅世界巡迴演唱會舉行記者會。

【北京直擊】楊千嬅噚日喺北京為明年嘅「My Beautiful Live世界巡迴演唱會」舉行記者會,獲劉德華、張學友、郭富城、古天樂、鄭秀文同余文樂等好友拍片支持,大會又安排兩位內地歌迷上台同千嬅互動。巡迴演唱會第一站明年3月喺廣州舉行,仲會喺內地其他地方演出,之後會去澳紐、美加同倫敦等地,千嬅話最希望尾站返香港舉行。

「估唔到佢放喺心」

千嬅喺今年3月同東亞娛樂約滿,佢話將會同老公丁子高自立門戶,自組經理人公司,所以喺記者會上,千嬅同老公丁子高開設嘅「正向娛樂」進行簽約儀式,成為旗下藝人,實行夫妻檔舉行巡演,千嬅笑住話好似喺台上再次證婚,今次之所以同老公合作,竟然係因為BIGBANG,千嬅話:「嗰陣我哋去咗韓國睇BIGBANG演唱會,睇到啲歌迷好熱情,成個騷氣氛好好,我同老公講,我諗呢世都唔會有呢啲機會,點知佢蹺埋雙手好cool講話個騷都未開始,估唔到佢一直將呢番說話放喺心,真係幫我實現到!」

千嬅仲話:「我冇諗過老公會將我講過嘅嘢放喺心,真係好多謝佢,我都諗有生之年做到巡迴演唱會,將來我唔喺度,個仔都可以睇番。不過我冇諗過有呢個機會,已經結咗婚,有小朋友就要對佢哋負責任,所以真係好多謝屋企人總動員幫手,我都有同個仔講,佢都明㗎喇!」至於同老公夫妻檔工作,千嬅話:「其實都有啲冒險㗎,始終𠵱家有兩個身份,佢繼續要忙自己公關公司,所以都好辛苦。」

撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載