› 選擇地區
三藩市
紐約
洛杉磯
其他美國地區
香港 台灣 北美
 
2019年01月03日

【馮仁昭四圍超】同伊健分享幸福真諦
黎姿湊三女返港

有「愛美神」美譽、47歲嘅黎姿(現名黎珈而)婚後生咗三個囡囡,雖然要幫細佬打理醫學美容嘅生意,但每逢大時大節都會同三個寶貝女去旅行。噚日下晝大約兩點,黎姿同三個囡囡、兩名工人步出機場接機大堂,隨即有保鑣護駕,素顏同着運動裝嘅黎姿一發現有傳媒,喺保鑣護送下急步向停車場方向行去,刻意同囡囡分開。黎姿全程未有回答問題,甚至囡囡想行去拖實佢,佢亦示意阿女唔好行近,最後護送囡囡上車後,佢先同大家講:「新年快樂!辛苦晒!」

重提《白恤衫》

另外,黎姿當年同鄭伊健合作拍《古惑仔》成為好朋友,為咗支持好友嘅演唱會,破天荒同伊健齊齊接受訪問。佢哋互讚大家keep得好好,𠵱家都各有家庭,黎姿覺得幸褔好簡單,只要識得感恩同容易滿足,幸褔之門就會打開:「人生有起有落,有成功有失敗,即使係落嘅時候都要感恩,挫折咪當係一個人生鍛煉。」伊健亦認為做人唔使太複雜!而伊健對黎姿當年大熱嘅歌曲《白恤衫》好難忘,仲對住黎姿唱番幾句,搞到黎姿忍唔住大笑,跟住佢哋提番當年拍戲嘅趣事,黎姿話自己有畏高,但其中一場戲講佢畀人追斬,同伊健喺簷篷跳落地下,黎姿話:「嗰陣以為有替身,點知原來埋位就要跳落去,真係好驚!」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載