› 選擇地區
三藩市
紐約
洛杉磯
其他美國地區
香港 台灣 北美
 
2019年01月11日

影全家福開心似中六合彩
陳茵媺同陳豪爭湊仔

陳茵媺雖然傾過拍劇,但想到沒人照顧子女而不放心。

陳茵媺昨日以低胸性感造型到中環出席護膚品牌活動,她笑說:「健康性感啦,今日想型啲!」現時大部份時間專注照顧三個寶貝,陳茵媺笑稱可以抽空現身,全靠老公陳豪(阿Mo)幫手:「我哋已經夾好咗,唔會兩個人一齊出去做嘢,是但有一個睇住小朋友,阿Mo都幾上手,我做到佢都做到,不過未必似我咁好囉!」

拍劇掛心

原來兩夫妻平日會爭湊仔,陳茵媺笑說:「我同阿Mo會喺屋企爭住湊小朋友,每日都好似比賽咁,由大仔開始,一喊就飆埋去。因為我哋兩個都上手,所以佢哋都好黐身,尤其囡囡同大仔都嗲,二仔就靜啲,啲感情收埋啲。」問到三個小朋友有否試過打交?陳茵媺說:「佢哋都會爭玩具,不過好快解決到,都少打交。我成日同佢哋講,We are one big happy family,所以要互相照顧、互相遷就。」

早前全家影月曆,陳茵媺坦言和小朋友影相很困難:「大人要keep住同一個表情,可能影十幾張先有一張靚,影到真係好似中六合彩咁開心。」除了月曆外,她還親自為屋企設計family year book:「等小朋友睇番自己去過邊、做過乜,係好好回憶同埋提醒。」至於無綫有否邀回巢拍劇?她坦言:「有傾過,但要睇時間,如果阿Mo拍得咁密,我又拍得咁密,冇人睇住小朋友會唔放心,不過我都好掛住拍劇,見步行步啦,暫時電影同出活動嘅時間係比較好嘅選擇。」

蔣怡取經

同場的靚媽蔣怡,笑言要向陳茵媺取經:「佢生三個太勁,我都好想聽佢分享吓,我自己兩個都適應緊。」她更認為陳茵媺能保持年輕靚樣,令她甘拜下風。

採訪、攝影:盧妹

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載