蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月11日
馬上成為壹會員

從演逾半世紀 專做女傭
81歲梁愛經歷跌傷喪子:我要活下去

【娛樂人物】現年81歲的資深演員梁愛,曾是無綫的「御用工人」,在《他來自江湖》跟周星馳多番鬥氣,更是不少人的集體回憶。近年梁愛飽歷身心傷痛,先是前年跌倒受傷,體重由110磅急跌至73磅,半年前其獨生愛子又猝逝,不過梁愛一次又一次以堅強意志挺住,更叫亡子不用為她擔心:「我又郁得、又可以活下去。」

採訪:戴彩煥
攝影:陳慧安

相關新聞:藝名出自才子老公左几

人稱「愛姐」的梁愛,是已故名導演左几的太太,60年代演出多部粵語片,70年代中開始在無綫演出,她在《狂潮》、《他來自江湖》及《義不容情》等經典劇飾演女傭,深入人心。後來愛姐舉家移民加拿大溫哥華,00年加入亞視繼續飾演女傭,但隨着亞視減少劇集製作,她也開始淡出娛樂圈。

愛姐前年在香港街頭仆倒受傷,要留院數月休養,這一跌令愛姐體重由110磅急跌至73磅,此後她更因腰患要經常服用止痛藥。愛姐日前接受《蘋果》專訪,她說醫生本來評估她將卧床不起,叫她準備入住老人院,結果她奇蹟康復過來。愛姐以過來人身份說:「我奉勸所有有病嘅人,一定要話畀自己聽『我得嘅!我起得到身……』如果你插滿晒啲天線(喉管)又唔死得,嗰種先係痛苦。命運弄人,如果我唔係咁硬朗,一早俾佢(上天)玩死咗!」

似耶穌釘十字架

患病期間,愛姐獨子對她照顧有加,已移居加拿大的獨子當時返港探望愛姐後回加,已訂機票在去年11月初再返港,打算為愛姐81歲做大壽。豈料兒子在半年前,於家中因隱性心臟病發猝死,終年55歲。愛姐慨嘆天意弄人:「個仔又唔係唔乖,佢又孝順、又好,一年返嚟睇你兩次,佢失驚無神離開咗你,你有乜感想?在我嚟講,好似耶穌釘十字架。」

提起愛子,一向硬淨的愛姐亦不禁落淚:「佢走咗我唔可以跟住走㗎嘛,我要堅強!人哋覺得我會發癲,我畀佢睇到我係可以活下去。我本來唔郁得嘅,我𠵱家話畀佢聽,我又郁得、又可以活下去。」愛姐邊抹眼淚邊說:「我哋三人行移民去加拿大,去完之後得番我一個返嚟香港,嗰種感受好難形容。」

相關新聞:鬥氣星爺 演乜都得

六七暴動一夜破產

命運確是多次跟愛姐過不去。60年代,愛姐最風光時,曾經擁有三個工人和一個司機,不過六七暴動令她變成一無所有。愛姐無奈地說:「六七暴動左派同右派鬥,我先生本來同泰國拍咗啲錄影帶同電影,佢哋話佢係左派嘅人,賣唔到過去,一夜之間唔見咗成60萬,破咗產,我由三個工人,結果我自己做咗工人。嗰時香港環境立立亂,佢又冇工開,我又冇工開,大家咪食穀種!」

當時為了生活,愛姐走去工廠做包裝工人,丈夫也變賣珍藏的魯迅作品及其他名書過活。後來麗的電視(亞視前身)邀請左几和愛姐加盟,70年代愛姐再轉投無綫,開始當上「御用工人」:「我嗰時好發錢寒,因為我要供個仔喺英國讀書,工人係咪最容易搵錢呀?對白唔使記咁多,可以走幾組,老實講,嗰時都係為錢啫。後期冇咁為錢,咪話唔玩囉,識攰咪唔玩咁多囉。」

未能見夫最後一面

97年1月,愛姐丈夫左几於加拿大病逝,他彌留當日,愛姐身在馬來西亞拍劇,愛姐說:「我老公死唔眼閉,我個仔錄咗我條聲帶話『老竇,你走得舒服啲啦,我𠵱家開緊工唔返得嚟呀,你走好,我哋唔使幾耐喺下邊見㗎喇。』」未幾左几病逝,享年81歲。

愛姐有一對年近三十的孫仔孫女,俱於加拿大生活,但愛姐無意長居加國,現時她於香港獨居,每日由鐘點上門清潔,閒時相約好友食飯敍舊。過去十年,愛姐已甚少參與幕前演出,僅在15年為港台其中一集《獅子山下》客串,近日港台邀她拍攝一個關於腦退化長者的劇集,她才出山。看透世情,加上擁有堅強意志,愛姐當可延續她的「工人」傳奇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載