蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月13日
馬上成為壹會員

慢歌調校 快歌冇事
學友抱病唱到盡 大女睇得忘我

現年57歲的「歌神」張學友前晚在紅館舉行尾站巡唱頭場,亦是今次巡迴第219場,學友表示香港開騷有壓力,免疫力變差。患感冒的學友為答謝歌迷,安哥就唱足十三首歌,但他指演出前段有少許聲沙,唱慢歌未能掌握,但到後段快歌就沒有問題。不過,台下的大女張瑤華就睇得投入。

相關新聞:創兩項紀錄「我係得嘅」

張學友歷時兩年多的「A CLASSIC TOUR學友.經典世界巡迴演唱會」,前晚在紅館舉行一連15場的尾站演唱會首場,亦是他今次巡迴的第219場演出。

學友整晚以歌會友,連大女張瑤華都有現身捧場,安哥時,學友更換上燕尾服唱出《用餘生去愛》,而現場螢幕同時播出他跟已故的張國榮、羅文、沈殿霞、梅艷芳及黃霑等合照,學友一口氣唱出《只想一生跟你走》、《我等到花兒也謝了》、《每天愛你多一些》及《李香蘭》等十三首金曲。

證騷後唔封咪

學友完騷後受訪,提到大女張瑤華睇得投入,學友即笑言:「自從呢個演唱會後,佢就係我歌迷之一,睇過好多場,佢都係我嘅強心針。」囡囡可會上台表演,學友斬釘截鐵:「唔會。」有傳學友完成巡唱後封咪,學友無奈地說:「絕對冇咁嘅事,唔知點解有咁嘅傳聞。可能係主辦商傳出嚟,啲人會覺得睇一場少一場咁,我真係好鍾意喺台上表演,我唔鍾意講退休嘅事,希望自己喺表演上試多啲唔同嘢。」

學友謂回到香港演出有點緊張,患了感冒和出現抽筋情況,他自嘲是老人病:「因為壓力大,免疫系統差啲,由上一站喺高雄演出,已經有啲病,𠵱家都有啲唔舒服。」家人知道學友抱恙演出都非常擔心,學友說:「自己盡力做啦,都唔係太辛苦。」後台可有安排醫生以防萬一?學友說:「又冇咁嚴重,之前醫生開咗一啲防流感嘅藥畀我,食咗之後會覺得有少少暈,都驚會影響演出,不過演出多咗、做巡迴多咗,遇過唔同情況,知道大概有幾大影響,可以控制到。」學友又扭傷腰部,他說:「做唔到慣常90度鞠躬嘅動作,要小心啲。本來想睇醫生,不過見到個情況向好嗰邊進發,覺得頭先跳舞都OK!」

學友指頭段演出有少許沙聲情況,顯得美中不足,他說:「剛返嚟,聲未係完全開咗,調校音響方面,都未係做得最好,只係覺得前段未係太理想,慢歌亦唔係自己控制之內,反而後面唱快歌就冇乜嘢。」

明白華仔苦況

劉德華去年確診流感,取消七場演唱會,學友說:「我都有睇到,聽完覺得更加驚,會有心理壓力,希望佢快啲好番,我相信我係取消最多次演唱會嘅歌手,我都明白取消個唱嘅心情,希望大家知道上咗台嘅我哋都想做到最好,做唔到最好已經好唔開心,仲要做唔到落去,係好辛苦嘅事情嚟。」學友獲悉華仔入紙申請今年底紅館檔期作補場,學友說:「希望佢嘅申請OK喇!」

採訪:王連連
攝影:葉君海

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載