› 選擇地區
三藩市
紐約
洛杉磯
其他美國地區
香港 台灣 北美
 
2019年02月01日

【娛樂人物】點評拍檔:張家輝真係幾麻煩
麥兆輝靚靚有親

麥兆輝憑02年的電影《無間道》成名,之後的《竊聽風雲》系列奠定他跟莊文強黃金拍檔的關係。這半年被喻為麥、莊的組合各自發展,先有莊文強的《無雙》贏票房,麥兆輝執導的電影農曆新年上映,戲中有御用演員劉青雲外,還有初次合作的袁詠儀,他更自爆大家是「表哥」、「表妹」關係。

採訪:蘇美怡
攝影:仇志德

相關新聞:青雲拍靚靚女友重逢

麥兆輝和莊文強被喻為麥、莊金牌編劇組合,這半年分道揚鑣。麥兆輝導演的《廉政風雲 煙幕》在賀歲檔出擊,先是戲名跟老闆經歷一場智力遊戲,戲名才得以落實。到選角時又是另一考驗,他心目中演被告的反派人選,是從不客串的袁詠儀(靚靚),他自爆今趟動用了「親情牌」:「我同靚靚有個秘密,同佢係『親戚』嚟,好細個十幾歲就識,佢叫我做『表哥』,我叫佢『表妹』,佢叫我媽咪做契媽,細個阿靚成日嚟我屋企玩。之後返嚟見到阿靚,點解佢咁靚嘅?之後佢去選港姐贏埋冠軍,做埋大明星,我繼續做副導演。」事實上,他們沒有血緣關係,但他對這個「表妹」有點怕。

家輝被低估

有趟麥兆輝在靚靚主演的電影當副導演,他說:「佢喺片場好嘈,見我食煙,佢就話『哦,你食煙我話畀你阿媽聽、你講粗口我話畀你阿媽聽』,成日用話畀我阿媽聽嚟嚇我。」戲中靚靚跟劉青雲在讀書時已是情侶,最後變成工作上的對頭人:「打畀佢,問佢會唔會畀面客串,仲同佢講『你唔做唔緊要,但唔好鬧我,唔好話畀我阿媽聽』。」

至於戲中另一位拍檔張家輝,也是初次合作,曾有幕後行家問起:「『呢套戲你搵張家輝,你見咗佢未?佢都幾麻煩喎』,我話真係?麻煩乜嘢先?嗰位幕後話『唔知呀,總之好麻煩啦』。」之後他相約張家輝傾談,原先以為一個小時的對話,足足傾了三小時:「佢真係幾麻煩,所有問題都係問你角色問題,好在我寫劇本,所以答到佢。通過傾偈,我都更了解個角色,佢係麻煩,不過係麻煩緊專業工作範圍嘅嘢。佢冇話要七個保鑣圍住、去酒店明明一個人要三間房,我聽過有呢啲情況。」他更斷言張家輝雖然贏過多個影帝獎座,但仍是被低估的演員。

《廉政風雲 煙幕》的故事講私煙、殺手滅口的故事,令人想起多年前廉署證人徐道仁在新加坡被殺的新聞,麥兆輝說:「嗰件事只係影子,徐道仁事件都好轟動。當時證人俾人殺咗,三個殺手都喺香港判咗刑,上年服完刑放咗監。呢件事係我做research時冇辦法知道真相,但有好多dramatic元素,於是我攞咗呢個背景,但唔係完全係嗰件事。」

獨立增收入

另外,麥兆輝透露跟莊文強暫時分開發展:「一齊去做產量好低,兩年先一部戲,10月睇到《無雙》新年又睇到《廉政》幾好。自己都好多年冇獨立做導演,費事又俾老婆鬧『點解唔拍多兩套戲』。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載