› 選擇地區
三藩市
紐約
洛杉磯
其他美國地區
香港 台灣 北美
 
2019年02月05日

Chilam闖幕後
靚靚下豬令:勤力啲

今日己亥豬年大年初一,影視圈中,大家都知道張智霖(Chilam)與袁詠儀(靚靚)是雙豬夫妻,他們今日跟大家拜年,祝願香港市民身體健康!萬事如意!財源廣進!談到豬年計劃,Chilam會創作劇本,側重幕後工作,靚靚聽罷即謂新春願望是老公「勤力啲」。

張智霖和袁詠儀今日大年初一,一家三口飛往日本滑雪,靚靚說:「我個仔講咗好多年,想摸吓好似powder嗰啲咁嘅雪,以前覺得個仔太瘦,去滑雪好似會危險,𠵱家佢實淨咗,咁咪圓佢心願囉!」Chilam指自己不會滑雪,靚靚也搶着說:「我都唔識呀,唔緊要㗎,活到老學到老。其實去到嗰邊一樣好熱鬧,好似喺香港過年一樣,因為大班朋友今年都係去同一個地方過年,滑雪已經唔係主要活動,大家都可能喺夜晚聚埋玩吓魚蝦蟹。」

最鍾意過新年

節日當中,靚靚和Chilam都表示最喜歡過年,以往都愛在港歡度春節,靚靚會在家貼揮春,放賀年全盒,擺年花,年三十晚會在兒子枕頭底放利是,然後開車去維園行花市。大年初一他們一家會吃齋,靚靚說:「我哋屋企習俗係大年初一第一口要食齋,個仔都要跟埋食,之後就可以食番肉,唔使全日食齋嘅。」夫妻二人覺得過年是最有氣氛,靚靚笑說:「細個住喺警察宿舍過年係最開心,可以去隔籬鄰舍屋企拜年,同朋友仔玩,有糖果食,又有利是𢭃。」Chilam也認同:「過年可以大家聚埋傾吓偈、打吓麻雀,玩吓魚蝦蟹,真係幾開心,不過隨住科技進步,人與人之間會變疏離咗,𠵱家send個圖就當拜咗年,細路玩online就當gathering,科技先進,對人係有好大影響,已經返唔到轉頭。」Chilam表示還是較緬懷以前過年的氣氛。

Chilam好滿足

問到靚靚和Chilam豬年有甚望展望?Chilam說:「今年我會做幕後嘅嘢多啲,自己創作咗一個劇本,當然仲要搵好多人幫手,個idea係自己,𠵱家已開始行緊,希望今年可以做到。」身邊的靚靚沒好氣說:「唔好得個講同諗字,要佢實行。今年冇乜願望,只係想老公勤力啲啦!」其實Chilam覺得去年工作也挺多和忙碌,但老婆看法不同,Chilam說:「同佢(靚靚)好似唔同空間生活咁,我覺得自己上年都好忙,但我老婆成日覺得我好得閒。盡人事去做所有嘅嘢。老婆雖然不斷push我,但我會按照自己節奏生活,好似佢唔識煮飯,我都冇push佢學烹飪,我只係想佢be yourself,因為人生係一個完整版圖,唔好臨死一個禮拜先覺得我咁多嘢未做,點解我將所有時間擺晒喺一個範疇,人生好多嘢要去體會,唔好強求,其實我早已經好滿足。」

採訪:陳月媚、羅慧敏
攝影:林德雄
鳴謝:陸智夫國術總會
場地提供:好酒好蔡

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載