› 選擇地區
三藩市
紐約
洛杉磯
其他美國地區
香港 台灣 北美
 
2019年02月10日

執番條命學會更珍惜家人
基仔積極做豬爸「我鍾意小朋友嘈」

【娛樂人物】古巨基和助手陳英雪(Lorraine)在14年結束長達二十年的愛情長跑,在美國註冊結婚。現年46歲的基仔日前接受《蘋果》專訪,與一班小朋友玩得非常開心,盡顯父愛。Lorraine早前因發福被傳大肚,可惜卻是美麗的誤會,不過基仔直言會繼續努力,希望今年造人成功生豬仔,愛熱鬧的他更說:「我鍾意小朋友嘈。」
撰文:余燕儀
攝影:周樂恒

相關新聞:【屢創高峯】入行做娛記訪問巨星

自言是「大唔透」又鍾意小朋友的古巨基,日前為賀豬年孖《飛天少女豬事丁》的寶妮到太古的排舞室,跟一班小朋友跳舞、玩「豬Q題」,並接受蘋果專訪,基仔與精力充沛的小朋友玩得相當開心,更不時露出爸爸笑容。

基仔在94年簽約唱片公司時,認識當時負責宣傳的Lorraine,兩人一直愛得低調,基仔多年來只稱對方為「得力助手」。至14年7月,基仔在美國拉斯維加斯迎娶Lorraine,結束二十年的愛情長跑。兩人結婚四年多,未有所出,不時被朋友催生BB。與小朋友打成一片的基仔直言:「我鍾意小朋友嘈,佢哋諗嘢飛嚟飛去,同佢哋玩特別有啟發。」問到有否計劃生小朋友?基仔坦言:「計劃一直都有,革命尚未成功,呢啲唔可以有壓力,要放鬆心情先得,最初都有問吓秘方,但最後得嚟好多人心得,都係話要放鬆心情,包括太太心情都要從容啲。」

相關新聞:新五虎感情好

造人冇壓力

愛妻號基仔雖然恨做老竇,卻不會向老婆施加壓力:「壓力對造人計劃唔要得,甚至工作都係,年紀越大,我覺得自己EQ越嚟越好,因為太太係我工作夥伴,佢要兼顧好多嘢,偶然有問題要解決,令到佢好煩,返到屋企之後,我嘅角色係幫佢撫平情緒:『唔緊張,冇事㗎,解決到。』相對以前非常拼搏年紀,我𠵱家步伐適中啲,處理事情成熟好多。」

有雙重身份的基嫂,不知是否有家用和人工?基仔笑說:「我成個人都畀咗佢,仲有啲乜嘢可以畀呢,哈哈!我哋放工返屋企仲係工作mode,因為有好多工作嘢要傾,但還好大家比以前會識得分開,唔好因為工作影響感情。」去年基仔在紅館開騷,不慎發生跌落台意外,幸好大步檻過平安大吉,基仔有感而發說:「有時啲嘢大吉利是冇下一秒,好話唔好聽,嗰一跌我可以唔見咗,但我執番條命喎,所以更加珍惜家人同朋友。」

要小心啲窿

今年4月基仔將在紅館舉行「We我們演唱會Part 2」,三場門票已爆滿,現加開終極尾場,合共開四場,基仔說:「嗰次跌完之後,太太會更加緊張我,特別有機關嘅演出,屋企人都成日提住我小心啲窿,我就會話上次都經歷過,我見過鬼實會怕黑,大家可以放心,乜嘢都檻過晒,豬年願望係自己同屋企人身體健康,我諗冇嘢比得上一家人齊齊整整,身體健康最緊要。」
場地提供:Studiodanz
化妝:NatalieSoo@ndnco
髮型:Mark Ip@hair salon

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載