蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月11日
馬上成為壹會員

【娛樂人物】
拍拖被背叛多次 冇得擔心老公
李蕙敏感覺男人都會出軌

女人的幸福,是找到一個愛自己的人,李蕙敏於6年前跟英籍老公Serge Micallef組織二人世界,原來李蕙敏過去在情場歷盡滄桑,曾試過幾次被男友背叛!明年兩人的婚姻踏入七年之癢,李蕙敏日前受訪時坦言冇得擔心:「感覺男人都會出軌。」
撰文:余燕儀
攝影:陳俊強

相關新聞:同Sammi爭天后

李蕙敏於13年嫁給英籍老公Serge Micallef,結婚6年依然甜蜜,惟當他們計劃做爸爸媽媽時,卻試盡了方法都未能成功,現更已放棄了人工受孕,李蕙敏說:「好辛苦㗎,荷爾蒙上上落落會影響情緒,個人又腫喎,我最怕打針,我試過幾次,我哋協議咗,試咁多就夠啦。」自小被收養的她,未見過親生媽咪,自己也可能沒機會做媽咪,「我唔會覺得遺憾喎,因為近呢十幾年,我好明白乜叫隨緣,人生當係一個餅,唔會樣樣都有,冇人係完美,接近已經好幸福,人好得意,永遠想追冇嘅嘢,我唔想自己係咁,自己會成日鑽牛角尖,如果放開啲,可能有意想不到嘅事發生。」

多次失戀,李蕙敏以為會做單身女人,卻於38歲那年認識老公,找到了幸福:「好似我結婚之前,我真係諗住以後都單身,一個人冇問題,可以好開心咁生活,但有時係無心插柳,當我哋好開心咁拍拖時,我又唔會好認真諗,幾時一定要結婚生仔,但直到我同佢結婚,要有小朋友可能太遲,呢個就係現實,但我哋明㗎,諗得通唔需要覺得唔開心,起碼我有一個好好嘅家庭。」

怨婦歌人生

唱怨婦歌包括《你沒有好結果》、《我為我生存》成名,現實中卻是幸福人妻,李蕙敏笑說:「唱呢啲歌其實完全唔係我嘅經歷,但反而我唱完之後,就有呢啲經歷發生,我都覺得好奇怪,人哋話人生如戲,其實人生都如歌。對我最傷害嘅經歷都係出軌,好易發現,所以女仔唔好太聰明,我𠵱家好叻,唔諗太多嘢,如果冇咁嘅事,預先攞嚟唔開心,如果有咁嘅事,你太早知道又有乜幫助呢?」經歷過男友出軌,有否對婚姻造成陰影,擔心老公會出軌呢?她坦言:「男友出軌唔止一個㖭呀,哈哈,之後當然會擔心啦,跟住嗰一兩段關係,你會好有警惕,會唔會又發生?開始覺得男人大部份都係咁啦,之後又從好欷歔到諗通咗,講真啦,分開一個下晝都可以出軌,如果兩個人有第三者出現,反映你哋關係出咗問題,嘗試檢討吓發生乜嘢事,會令到人有隻腳可以攝到埋嚟呢。」

相關新聞:搵番自己把聲

花槍變冷戰

問到老公是否很忠心?李蕙敏笑說:「表面上係嘅,實際上唔知吖,咁咪信住先,冇所謂。自己就冇試過出軌,我唔係嗰啲可以對唔同人講大話,仲可以記得上次講過乜。開心唔係人哋畀你,係你點諗,珍惜你擁有已經開心。」

婚後的李蕙敏,由孤單一人變了二人世界:「我覺得最大影響,係多咗一個人一齊住,其實幾開心,有屋企感覺,真係有家,因為佢個人好奀皮,雖然好搞笑,但有時令你覺得好煩呀,點講呢,佢鍾意拗頸嗰啲。」雖然耍花槍是情趣,但多了卻可能會變成冷戰,她坦言:「都有試過,呢啲唔需要掩飾,因為人性嚟,有好多人鬧吓鬧吓就一世,我哋唔係鬧,大家都覺得自己嘅論點啱,佢又要贏,我心諗你贏囉,我係天瓶座,可以做第二。」

生活要夾到

夫妻相處李蕙敏認為最重要是包容:「懂得幽默地去生活,拗還拗,拗完要笑番,唔好有隔夜仇,咁就長久,我哋識咗都就快十年。啲人成日話要搵一個乜嘢人先啱啦,我覺得一定要生活夾到,如果生活夾唔到,有時幾愛都冇用,如果喺屋企,所有起居飲食都唔啱嘅,唔可以遷就係好難,同埋價值觀,有啲人係搵錢至上,咁我哋唔係最緊要錢,當然生活需要金錢做工具,但所有嘢往錢看,人生好辛苦,臨走發現冇享受過生命,會覺得好可惜。」
場地提供:富薈炮台山酒店

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載