› 選擇地區
三藩市
紐約
洛杉磯
其他美國地區
香港 台灣 北美
 
2019年02月14日

情人班㦸預祝BB出世
黃澤鋒夫婦相愛包容 互數缺點

今年51歲的黃澤鋒和52歲太太陳麗麗結婚第十個年頭,上月黃澤鋒宣佈造人成功,豬年開始三人行。今日是情人節,黃澤鋒日前帶陀B女四個月的太太行公園,再嘆情人節大餐,並親手為太太炮製班㦸,在碟上寫上「I love you & BB」,令太太甜入心。

相關新聞:患妊娠濕疹難入睡

想佢再開心啲

黃澤鋒夫婦一同接受《蘋果》專訪,黃澤鋒感激太太為他超高齡冒險生B,他說:「今年將做阿豬爸、阿豬媽,心情好緊張。今個情人節,我要好多謝太太,佢咁多年嚟忍受我脾氣,我份人幾急,但佢有方法對付我,佢好包容。」他指是太太令其人生變得更豐盛:「我有時諗嘢好負面,佢會用方法令我諗得正面。我自問仍然畀唔到好多嘢太太,無論金錢或物質,餘下日子,我希望可以畀多啲嘢佢,錢唔係代表一切,但我想太太生活過得好啲,想佢再開心啲。」

曾有一段失敗婚姻的黃澤鋒,於04年與首任太太結束四年婚姻,但離婚沒有為他留下陰影,他打了一個比喻:「等於一隻馬騮俾人用繩束住,但突然剪斷咗條繩,馬騮會唔會拎番個套箍住自己,正確啲嚟講,我就正正用番繩箍住自己條頸。我都問過自己,太太係我嘅Ms. Right,唔關年紀事,我同佢一齊時,好想畀個名份佢,即要鎖緊自己,唔係太太逼我。」

希望行到120歲

這些年來,無論風風雨雨,黃澤鋒總得到太太支持,但在他的眼中,太太也有缺點:「唔出聲係佢性格,佢有時都小器,但好正常,邊個女人唔小器吖!」他更對太太許下承諾:「我會畀心機做嘢,希望太太身體健康,可以同佢行更遠,我都就快52歲,但我希望同太太行到120歲,同太太一齊好開心。」

陳麗麗對於被老公指小器毫不介意,因為她深信夫婦相處之道,是要將彼此的優點和缺點全部接收,她亦踢爆黃澤鋒有固執一面:「我盡咗最大能力去改變老公唔好鑽牛角尖,佢固執時,我咪善用我嘅小器,令佢怕咗我、慢慢改,佢肯去試,我都好感動,我係好支持佢。」她坦言兩夫婦以往的情人節都沒有特別慶祝,但今年開始變成一家三口,最值得紀念。最後黃澤鋒向太太送上情深一吻,承諾:「出年有BB錫你,我希望太太幸福,一家都幸福,我就開心。」
撰文:比華利
場地提供:The Stadium(觀塘)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載