蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月19日
馬上成為壹會員

【娛樂人物】鄒文正情創後遺

鄒文正坦言父母離異留下陰影,但未至太悲觀。

現年31歲、有「翻版林峯」之稱的鄒文正,以創作歌手入行,外形俊朗花弗的他,現實卻是宅男,在娛圈浮沉八年以來,緋聞近乎零。單親家庭長大的他,小時候曾心靈受創,戀愛時又試過被分手,難怪對感情謹慎,絕不輕易言愛。
撰文:祖李
攝影:林德雄

鄒文正生於演藝之家,父親是band友,母親是內地DJ,自小就跟爸爸到酒吧表演,耳濡目染下,對音樂有團火。他說:「父母都好鍾意音樂,成日喺屋企播歌,我讀幼稚園嗰陣,媽咪夜晚要返電台錄節目,老竇怕我一個人留喺屋企,去酒吧表演都帶埋我,佢喺台上表演,我就坐喺台下等,老竇收工我已瞓着,佢就孭我返屋企,第二朝我話攰,佢會由得我唔返學。」

危機感重

小學時父母離異,但鄒文正對婚姻仍有憧憬:「父母嘅事令我有陰影,我都好驚分開,但未至太悲觀,反而經常警醒自己,危機感重,會更珍惜關係。我拍拖唔多,初戀發生喺小學,嗰陣好純情,喺學校寫吓信、約會吓,最後女朋友向我提分手。嘗試挽留但不果,可能係畢業後少見,大家淡咗。」

鄒文正覺得完整家庭要有子女,希望與伴侶有共同的人生目標:「由細到大都渴望成家立室,細細個已經諗將來同自己小朋友一齊夾band,但𠵱家好多女仔都唔鍾意生育。我家庭觀念重,認為要有下一代,但回歸現實唔可以強求,其實搵個溝通到已經好難。」

值得借鏡

在最近的賀歲片《如珠如寶》中,鄒文正不但是王菀之的暗戀對象,更有機會與多位前輩合作,鄒文正說:「我好敬佩泰迪羅賓,佢冇乜表情動作,一句好簡單嘅對白,佢平淡咁講出嚟,都帶動到好多情緒,好值得我借鏡。喜劇最難做,內心要好多層次至得,好似師兄張繼聰咁樣,佢拍喜劇時都加咗好多自己嘅思想,去展示佢嘅獨特個人風格。」
場地提供:丸十壽司日本食堂

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載