› 選擇地區
三藩市
紐約
洛杉磯
其他美國地區
香港 台灣 北美
 
2019年02月21日

睇《新喜劇之王》有共鳴
黎燕珊爆曾遭欺凌

黎燕珊前晚自爆在邵氏拍戲時曾被金馬男主角糟質。

田啟文(田雞)、黎燕珊、鄂靖文及姚嘉妮等前晚現身金鐘出席活動,黎燕珊表示電影《新喜劇之王》令她憶起很多初入行的往事:「呢套戲同我追夢嘅過程好有共鳴,未選美之前,我喺邵氏拍戲,當時被一位金馬男主角,佢係香港演員,𠵱家仲喺度嘅,不過已經冇做呢行,當時佢應該飲醉酒埋位,導演已經叫咗cut,佢仲繼續糟質你,又扯你啲衫,又踩你,仲講粗口鬧你,當時我心諗,點解你咁樣蝦一個同業嘅師妹,對於一個16歲想追夢嘅演員嚟講係好多問號,自己咪匿埋喊囉!」

代澄清不拍《功夫2》

黎燕珊續說:「之後有個副導演行埋嚟,拍拍我個頭『算喇!儍女唔好喊!』不過𠵱家睇番轉頭,要多謝呢位男主角畀我一個咁大嘅挫折,人係要有衝擊,如果唔係遇到佢咁樣,我唔會去選美追我個夢,而有演戲嘅機會。」不過她拒絕透露對方身份。

田雞提到新片跟當年的《喜劇之王》一樣,靠踩腳學識痛,他說:「星爺唔話我知,應該係怕我收貴,因為冇人代替到呢隻腳,𠵱家踩低咗個價㖭!」問到星爺是否開拍《功夫2》?田雞說:「可以好大膽話畀大家聽係唔拍,係一定唔會拍,唔好再講,唔好再傳,就算佢講都係呃你,我可以寫包單,佢𠵱家忙緊《美人魚2》,做埋後期,今年上畫。」

戥李兆基結婚高興

對於去年確診患癌的好友李兆基入紙註冊結婚,田雞表示戥對方高興:「手術成功,跟住又可以小登科,係難能可貴,所以我第一時間打畀佢,不過佢把聲唔係幾好,可能做完手術,休養緊,我就冇乜打搞佢,就留咗口訊畀佢,恭喜佢。」有否見過對方女友?田雞說:「唔通拍戲問佢𠵱家邊個女朋友,我有搵佢工作,佢話佢中風,行動同講嘢都唔方便,就算想搵佢做嘢,都唔敢煩佢。」
採訪、攝影:黃曉妍

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載