› 選擇地區
三藩市
紐約
洛杉磯
其他美國地區
香港 台灣 北美
 
2019年03月16日

【娛樂人物】歷低潮出走北京療傷
側田命硬未輸

人有高低起跌、順境逆境,相信深有體會者,側田絕對是其中之一。事關42歲的側田,29歲推出首張專輯即大賣,入行八個月便踏上紅館舞台,成為當年出道最短在紅館開騷的歌手。不過「人紅是非多」,低潮時曾經歷出賣和背叛的他,避走三年後返港重新出發,正如其歌曲名字《命硬》的側田,今年6月再踏紅館開騷,他說:「香港始終係屋企!」

採訪:曹家誠
攝影:陳俊強

相關新聞:感激女友肯聆聽

入行13年的側田,日前在土瓜灣接受《蘋果》專訪,回想當年點滴時嘆謂:「公司成日話我『醒啲啦!我哋擺咁多心機畀你,你一嘢搞禍晒!』但我都唔想,你哋係簽我唱歌,唔係簽做藝人,佢哋覺得我要日日見報做訪問,但當時冇人教過我點樣去做,做完返屋企我不斷諗有冇講錯嘢,會唔會又畀公司鬧,坦白講到𠵱家都怕做訪問。」

離開與回流

遇上逆境,卻找不到解決方法,2011年側田選擇離開,他說:「喺香港最差嘅時候,每日好似行屍走肉咁,終於決定同當時嘅女友搬去北京住,因為覺得喺香港做得好冇意思,都唔知為乜,我好唔開心,需要離開唞吓氣。」

留在北京三年,側田認為那是一個復原期:「我覺得好舒服,出街好似再唔會有人望我,喺當地三年其實都夠,加上當時女朋友喺嗰度,好開心有個伴。」然而,側田和女友分手後再回到香港,雖然這個地方令他有過不快,但側田認為香港就是他的家,跟在美國和北京,感覺就是不一樣,總是融入不到那些地方。

今年6月,側田在紅館舉行第8次個人演唱會,演唱會名為「My Beautiful Curse」,意思是漂亮的詛咒,他說:「每個人天生都有一種gift and curse,例如我有能力喺台上帶畀大家歡樂,同樣亦令我過得唔愉快。不過,都有矛盾嘅時候,因為投入表演我需要好emotional,但落到台呢種性格有時會令人好討厭。」

出賣與得着

側田13歲便到美國讀書兼打工,回流香港做音樂,爆紅令他和囂張、寸嘴、媾女王成為等號,側田說:「我當時其實乜都唔識,通常人哋入行要捱四、五年先至慢慢出嚟,但當時一嚟就咁,從來冇人教我要點handle,我唔識點樣面對傳媒,佢哋問乜我咪直接講,就係咁得罪人,事實係發生咗,冇得返轉頭亦冇得唔接受。」

然而,側田認為經歷低潮也不是沒有得着,至少能看清人生百態。他說:「事業滑落連身邊人態度都有改變,有人會兜口兜面講啲好難聽嘅說話,試過喺隔籬枱都當我冇到繼續講,又或者直接拎住個電話行埋嚟影你相,當然仲包含好多出賣同背叛。」
場地提供:Joyland 聚友坊
化妝:Yen Lai

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載