› 選擇地區
三藩市
紐約
洛杉磯
其他美國地區
香港 台灣 北美
 
2019年03月21日

【娛樂人物】千嬅湊仔有缺失

45歲楊千嬅和39歲老公丁子高結婚9年,去年組成工作夥伴,今年歌影視三線發展,工作忙,與6歲兒子丁進諾(Torres)見面時間更少,兒子就曾比較同學有媽媽整便當,自己沒有。由藝人、人妻到做人母,千嬅刻下朝早7時起來與兒子吃早餐,晚飯也盡可能一家人吃,讓兒子有家庭觀念。

採訪:卓寶花
攝影:林賓尼

相關新聞:生存到係大命

今年歌影視都會見到楊千嬅蹤影,今個月底開始實踐巡演夢想,也是自組公司後最大項目,做好體能訓練之餘,將廣東歌音樂文化推廣出去,巡迴要花上很長時間,未能每日陪伴兒子,千嬅平日會爭取時間親子,她日前在灣仔受訪時說:「Torres返學有固定時間,冇早兩年咁黐身,以前佢會唔開心,𠵱家會講說話,寫字條喺門口。」

阿仔想食住家飯

千嬅續說:「生完仔我成個人生變咗,由日夜顛倒到𠵱家7點幾起身,因為個仔會拍門入嚟,覺得每日可以穩定食個早餐或晚飯,已經可以溝通好多,盡量早晚想見到阿仔,等佢有家庭觀念。」

Torres漸長,明白媽媽要工作,但也會像一般小孩一樣想法,千嬅說:「佢會覺得點解每個媽媽都會喺屋企整個飯盒畀小朋友,點解你永遠都冇為我做一個菜,我有整過壽司,但佢想要煮飯嗰種,有日我親自下廚煮鮮茄蛋牛肉飯,佢第一口擺落口時個樣好怪,我話做乜,好唔好食?佢冇乜表情,食食吓話媽咪我飽,食唔落,後來從姐姐口中得知,佢話點解好似甜品味道,因為牛肉要落糖,我多手懶健康落冰糖,成嚿石頭咁放落去番茄度,好似番茄糖水咁,梗係怪啦。」不過遭受打擊,千嬅仍樂意為兒子下廚。

千嬅去年與老公成為工作夥伴,之前夫妻檔上陣拍攝理財廣告吸金。理財方面千嬅自認不是精明投資者,好心急,欠缺老公丁子高一份頭腦冷靜和觀察性,更不能是家中財政大神,「好大鑊,叫我計數冇樣啱數,概念唔好,一直以來媽咪幫我管理,有家庭後要自己負責,唔太複雜,小朋友起居飲食就OK。」千嬅希望兒子有正確價值觀念,去年幫兒子Torres開戶儲利是錢。

相關新聞:搶鄧萃雯角色

老公教識要妥協

夫唱婦隨搵錢有利有弊,溝通可以更直接,但意見分歧少不免,千嬅說:「說到底覺得易解決因為佢係我親人,我先生做開公關巿場,佢會從客戶角度解釋我聽,以前我冇聽過,又唔想知,佢會同我講你有要求唔緊要,但要配合到個客,有時有啲嘢係要妥協,妥協唔係你核突同低水平,而係巿場角度人哋冇賺嘅原素,點解要贊助你呢,以前啲經理人唔會講呢啲,全部內容被革走。」如今千嬅會聽從老公意見,變得協調,並激讚說:「呢方面我先生增進我好多知識,尤其工作耐性,會諗人多啲,藝人通常自我中心好高,諗自己先。」
化妝: Kineks Ho of LingChan Makeup
髮型: Vic Kwan of ii Alchemy Hair & Nail

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載