蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年03月21日
馬上成為壹會員

《皇家師姐》Eddie Maher心臟病離世

外籍男演員馬艾迪(Eddie Maher)前日離世,他活躍於八、九十年代,曾參演《皇家師姐》、《鬼打鬼之黃金道士》及《孟波》等電影,曾與他合作《海狼》的任達華對於舊拍檔離世表示可惜。

任達華嘆好可惜

任達華昨日說:「當年我哋合作好多,Eddie喺尖沙嘴開健身中心,我同高麗虹有去做運動,有打拳有做gym。Eddie個人好好,對電影同運動都好有熱誠,大家不時交流心得。不過後期大家各有各忙少咗聯絡,我都好耐冇見佢,今日睇到佢死訊覺得好可惜。」

外籍動作演員羅芙洛昨日也在fb留言表示傷心,指當年因拍《皇家師姐》而與Eddie成為朋友。

Eddie生前與何麥(Mark Houghton)合作無間,有如一家人般親密,何麥的女兒何慈茵昨日接受本報訪問,指Eddie因心臟病離世,她說:「Uncle Eddie同我爸爸係好朋友,我哋一直都有keep住聯絡,我喺噚日收到佢徒弟嘅通知,知道佢走咗。其實uncle Eddie本身有心臟病,近年嘅身體唔係太好,近呢三、四年成日出入醫院,但真係冇諗過佢咁快就離開。」她還說:「我哋上個禮拜先傾過電話,因為我爸爸嚟緊會拍一套電影,本來有個角色預咗佢拍,佢都有問我資料,亦都有傾啲打拳嘅嘢。」

問到與這位uncle的相處軼事,何慈茵說:「有好多難忘事,我最記得以前細個嗰陣爸爸去咗拍電影,Uncle Eddie會陪住我,又或者揸車接我去探爸爸班,嗰陣佢係揸跑車,試過有一次我暈車浪,嘔到成架車都污糟晒,呢件事真係好深刻。」

何慈茵父辦後事

近年何慈茵比賽,找了Eddie做教練:「我第一次學kickboxing就係佢教我,之後佢有幫我準備比賽嘅嘢,成日問我嘅近況,又或者教我點準備比賽,調整吓我嘅心理狀況,雖然𠵱家佢離開咗,但係我都會繼續將佢教我嘅嘢好好發揮。」

至於後事的安排,何慈茵說:「佢本身冇結婚,屋企人全部唔喺香港,不過有一個女朋友,佢後事由我爸爸、佢女友同徒弟一齊處理。」
採訪:唐琛悠、陳杰

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載