› 選擇地區
三藩市
紐約
洛杉磯
其他美國地區
香港 台灣 北美
 
2019年03月25日

【add人物】
父親林建名啟蒙相機不離身
林煒珽朦朧學

林建名三女林煒珽現在父親的娛樂公司做創意方面的工作,業餘時間醉心攝影,日前她在中環舉行了首個個人攝影展。對於幫手打理家族生意,她純是分擔年邁父親的工作量,在攝影的世界,就可以自由地表達心中所追求的朦朧美學角度。
撰文:梁錦雯
攝影:陳慧安

相關新聞:相靜謐

林煒珽人所共知是人稱「大少」、大名娛樂老闆林建名的三女,近年她幫手打理家族生意,在大名出任執行董事,主力做創意推廣的範疇。除了這份正職,她還是攝影師,她Ig的自我簡介是一名「Photographer Artist」,有個叫VL Visuals的攝影網址分享作品,當中多以世界各地風景及lifestyle為題材,日前在中環舉行了首個個人攝影展。

捕捉叠影

不時都與其他攝影師搞展覽的林煒珽,一直想舉行個人展,她說:「兩年前自己諗可以做啲嘢,上年因為要搞婚禮,到年尾有間gallery問我想唔想搞個人攝影展,我就講『你幫我就得』,因為我一個人係做唔到嘅。」打理家族生意,要與商業元素為考慮,做攝影就可以多一點屬於自己的個人空間及自由度,如攝影展中一個以瑜伽為題材的照片,她以數元買的垃圾膠袋做道具,包裹着女模的半裸身體為造型,相當有創意。

誰啟蒙林煒珽攝影?原來就是她父親,父親在中學開始送她一部卡片型相機開始,「我就隨身帶住去影相,後尾像素太低關係,要求又越嚟越高,咁就買咗部大機啦,佢有買好多書畀我,但係影相係唔需要睇書,你練得多就OK,每樣嘢都喺度不斷試。」愛上攝影,她鍾愛multiple exposure的攝影風格,如展覽首日,她在未開幕前找來公司藝人陶枳樽做模特兒,捕捉她遊走的重叠身影。林煒珽曾在紐約名府Parsons School of Design修讀黑白菲林短期課程,卻從未打算將攝影當做職業:「要影commercial嘅嘢係唔啱我,因為鍾意以我角度去影相,唔係為其他人而影相,商業係人哋要以某一個角度,將嗰張相跟番佢嘅角度,我想以自己角度影相。」

父訓勤力

隨着父親年紀大,林煒珽與家姐及弟弟都分擔不同的家族生意,提到指定問題,父親是你的上司會有磨擦嗎,她笑言為了大家開心才一起工作:「𠵱家大家方向係一致,以前都有拗,每人都講吓啲道理,佢好想做嘅嘢,就算唔make sense都去做,有陣時執着係正常,每個人都有執着嘅時候,會唔會profit,好多嘢都係搏出嚟,做落先知。」她佩服爸爸活力十足:「佢唔會攰,好energetic,我個人成日都好攰,佢都八十幾歲,仲有好多精力周圍走,如果唔喺公司,都喺廣州公司,同去咗旅行,啱啱喺西班牙,我哋體力唔係咁及佢,佢都鼓勵我鍾意做就做,唔好影響到公司就得,叫我做乜都要勤力啲,唔好咁懶。」

老公意見

對於攝影,林煒珽還有很多範疇想嘗試,如建立影菲林的耐性,更想去做電影工作,她說:「未知乜崗位想做,會慢慢研究吓。」問到她剛結婚會否影響追求自己的理想,她笑言:「結咗婚同冇結婚差唔多,只係一齊住,佢有鼓勵,唔好成日出國就得,佢覺得應該成日要一齊喺香港。對於攝影,佢好有意見,不如用另一方式去試,好多時都建議咗方式去試。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載