› 選擇地區
三藩市
紐約
洛杉磯
其他美國地區
香港 台灣 北美
 
2019年03月25日

女嘉賓輪住合唱 許廷鏗搞喊謝安琪

謝安琪表示唱第一粒音已想喊。

許廷鏗前晚首次在紅館舉行個人演唱會,父母和哥哥到場支持,他在台上多謝觀眾:「今次係我第一次紅館開四面台,我呢啲衫都有我啲畫作,其實我嘅志願係做漫畫家。」之後他與嘉賓林欣彤(Mag)合唱《忍》,其後與王灝兒(JW)拖手唱《矛盾》,二人更感觸落淚。

「同朋友分享舞台」

二人唱完後,許廷鏗說:「同JW喺中學年代已認識,我哋儍吓儍吓。我從來唔覺得一個人要去成全自己先叫成功,如果冇身邊嘅人同你一齊係唔會有意義,我覺得今日好有價值,最想就係同呢班朋友分享呢個舞台,佢保護我多過保護佢自己,佢錫我多過錫佢自己,佢會將所有嘢都分享畀我,我好開心,佢仲更加開心,我唔開心,佢會更加嬲,如果你好似我咁幸運遇到咁樣嘅一個人,大大聲咁話佢知『你喺我心目中係好緊要㗎!』」當許廷鏗講到喊時,好友鄭欣宜現身,二人邊喊邊唱《女神》,最後四人同台合唱《十年約會》及《青春頌》。

謝安琪(Kay)擔任安哥嘉賓,與許廷鏗合唱《我歌故我在》,她表示唱第一粒音已感動到想喊,她說:「我哋有好多嘢好投契,你有時好憂鬱,有時又好正能量。」最後二人以《神奇之旅》作結,由於歌迷不肯離場,許廷鏗再上台唱多一首歌。

「初夜唔畀胡鴻鈞」

許廷鏗完騷後受訪,笑言「初夜」感覺很好,提到搞喊JW和欣宜,他說:「綵排嘅時候我都有喊,我心目中一直有個紅館畫面,希望可以同我最close嘅人分享。」哪個是大婆?他笑指:「我要講欣宜係大婆,Mag同JW一定明。」對於胡鴻鈞坐第一行,許廷鏗解畫:「隔籬係釗峰,啲位唔係我分配。」為何沒邀對方上台?他說:「下一次,點答呢?初夜梗係唔畀佢。」談及好友張栢芝撐場,他續說:「栢芝係自己話嚟。」他表示個唱上未有騷肌,因只得四嚿未夠好。

此外,許廷鏗早前被爆希雲街通宵會女友,他澄清:「希雲街係工作室,噚日做嘢都做到4點幾,呢排成日都係咁,大家有興趣搵我,就去希雲街。」他表示現時沒拍拖。
採訪:黃曉妍
攝影:林賓尼

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載