蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年04月24日
馬上成為壹會員

【馮仁昭四圍超】阿姐送別陳百強父親
讚唱戲出色

陳百靈噚日一早就到靈堂打點,佢話爸爸陳鵬飛走得好安詳。

陳百強(Danny)父親陳鵬飛本月5日離世,享年95歲。Danny哥哥陳百靈噚日喺香港殯儀館為爸爸設靈,今日出殯後喺荃灣華人永遠墳場下葬。陳百靈同家人噚日約晏晝4點前已抵達靈堂,而「為你喝采陳百強」歌迷會亦有成員到場幫手打點,汪明荃、楊受成父女、顧美華同趙雅芝夫婦等先後到靈堂弔唁。

喪禮冇宗教儀式

陳百靈接受訪問時神情肅穆,佢話喪禮冇宗教儀式,爸爸離開時好安詳,生前亦冇乜特別病痛,一向都好精神。問到陳爸爸生前有冇交代身後事?陳百靈話:「冇準備,好突然,所以冇講。」點解唔將Danny同爸爸一齊葬埋喺將軍澳?陳百靈話:「唔會,佢(爸爸)會同爸爸(爺爺)一齊,土葬,喺荃灣,Danny喺將軍澳。」至於陳媽媽心情?佢話:「好自然,冇特別,好正常,佢都會嚟。」陳百靈又講到爸爸留下嘅生意,佢哋幾兄弟會幫手打理。

阿姐感慨話好唔捨得飛哥離開:「同飛哥好熟,除咗佢係Danny爸爸之外,喺粵劇界係唱得好出名,我哋都有聯絡,佢中環有錶行,經過都會去打招呼,佢係好好嘅長輩。」陳爸爸離世係咪好突然?阿姐話:「始終老人家,佢大仔有講佢爸爸走得好安詳。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載