› 選擇地區
三藩市
紐約
洛杉磯
其他美國地區
香港 台灣 北美
 
2019年05月16日

劇集煞科 馬國明揸愛驅洗靚靚

【大坑】黃心穎同許志安上月俾《蘋果》獨家踢爆「安心偷食」後,兩人除咗道歉外,仲不約而同全面停工。受害者之一嘅馬國明,一直寄情工作,專心趕拍劇集《降魔的2.0》,近日劇集煞科,馬國明終於可以停下來小休,畀啲空間去處理自己嘅心情。噚日晏晝4點左右,馬國明就去咗大坑浣紗街一間洗車屋,當時佢揸咗架白色越野車,佢將架車交咗畀職員後,就企喺舖頭入面睇電視。

戀情凍過水

現場見到馬國明已經冇再戴舊年同心穎一齊買嘅定情戒指,只係戴咗一條戴咗好多年嘅銀鏈,似乎戀情真係凍過水。最初馬國明未發現記者蹤影,隔咗一陣先發現有人影相,佢初初有啲愕然,但之後就向記者揮揮手打招呼。問到女友心穎已經離港避靜,仲有冇同佢聯絡?馬國明只係話:「之前要講嘅已經講晒,我唔會再回應喇,唔該晒!」大約過咗半個鐘,馬國明就揸番架車獨自返太古城屋企。

噚日馬國明揸嘅白色越野車,據資料顯示新車落地唔夠一年,當時車價超過110萬元。其實佢本身係愛車之人,前年為咗方便爸爸出入,就用咗84萬元換咗一架新車,之後又話考慮為家人再換一架七人車,不過佢嘅姐夫比佢快一步,換咗部七人車,可能咁就畀馬國明換到部心水靚車。
採訪、攝影:畢紹基、孔志豪

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載