› 選擇地區
三藩市
紐約
洛杉磯
其他美國地區
香港 台灣 北美
 
2019年05月19日

【姐匙Talk】皇太后拆散心心壯哥

近年好多小生都鍾意追求年輕貌美嘅小花,表面睇,成功率近乎百分之一百。但其實喺大台追女仔都有好多潛規則,如果你冇身份冇地位,即使有錢又靚仔,一樣追唔到女仔。點解?唔係女仔唔受媾,而係「皇太后」會出手阻攔。

我Jessie早前遇見「壯哥」,佢苦瓜乾咁嘅面口,話啱啱撞番前女友「心心」,佢嬲爆爆話:「如果嗰時唔係俾人入房照肺,我哋可能結婚生埋仔㖭啦!」壯哥同心心都係選美出身,但女嘅攞咗冠軍,男嘅落選變成二打六,雖然名氣懸殊,但佢哋一齊做過嘢,又啱嘴型,外表睇都係型男索女,好快就走埋一齊。

有次壯哥同心心俾記者撞破拍拖,皇太后即日叫咗心心入房,施壓叫佢唔准同壯哥繼續來往,仲話:「呢個人幫唔到你,反而會拖累你前途。」壯哥越講越勞氣﹕「但我冇俾人叫入房呀,可能覺得我係nobody啦。」其實壯哥家底都唔差,收入微薄都揸名車出入,但就唔係力捧對象,即係幫唔到公司搵錢,壯哥最後更入埋雪櫃!講到最後,壯哥同心心就無奈要接受分手,雖然𠵱家佢哋各自都有另一半,但壯哥每次提起往事都一殼眼淚。
撰文:Jessie

姐匙Talk

我姐匙縱橫歌影視幕後,多年嚟冷眼旁觀,娛樂圈大小事都走唔過我雙眼,歡迎大家嚟剝花生。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載