› 選擇地區
三藩市
紐約
洛杉磯
其他美國地區
香港 台灣 北美
 
2019年05月22日

【馮仁昭四圍超】拍戲撼攝影機
邵仲衡傷頭縫5針

邵仲衡笑言收咗利是當係鴻運當頭,會休息兩日再開工。

邵仲衡(大佬孝)近日忙於為漫畫家肥良執導嘅電影《母夜叉》開工,開工以嚟一直順順利利,但前日唔小心發生咗「爆缸」事件,搞到大佬孝額頭受傷,要縫五針。

大佬孝噚日接受訪問,講到受傷經過,佢話:「早排我去咗一個鬼怪地方拍攝夜探節目,嗰陣師傅贈咗我兩句,佢提我今年有血光之災,叫我要事事小心,估唔到真係應驗咗!」佢又話:「呢套戲一直都拍得好順利,我已經好小心,不過個心一路認住,噚日拍嘢落雨,點知有個工作人員唔小心,咁啱個攝影機停唔到,一嘢撞咗埋嚟,無端端應驗咗血光之災。」

休息兩日

查實大佬孝受傷一刻大家都好緊張,本來諗住送佢去醫院,但大佬孝唔想影響拍攝進度,於是堅持止血後繼續開工,結果拍完之後,劇組人員即刻送佢去醫院接受治療,大佬孝話:「真係要多謝醫院嘅醫護人員,佢哋仲同我講笑,護士長又出嚟同我清洗傷口,個個都對我好好,好溫暖,最後縫咗充滿愛心嘅五針。」雖然受傷,但佢仲講笑話:「今次中咗頭獎,收埋利是當係鴻運當頭,我會休息兩日再開工。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載