› 選擇地區
三藩市
紐約
洛杉磯
其他美國地區
香港 台灣 北美
 
2019年05月24日

【娛樂人物】69歲薛家燕 空中瑜伽減腩

薛家燕為下月的澳門演出,向瑜伽導師拜師,從來未做過瑜伽的她,在導師指導下學習四式,雖然動作看似輕鬆,但對初體驗的她來說其實有難度。不過當家燕姐挑戰成功時,就一臉得意大講爛gag:「好輕功,估唔到一個咁重嘅人,都可以身輕如燕,正如薛家燕。」
撰文:比華利
攝影:陳俊強

相關新聞:自稱屬中間肥胖型

現年69歲的薛家燕於下月29日在澳門舉行「薛家燕愛你無限60年演唱會」,為以更佳狀態見觀眾,近日向瑜伽導師思敏拜師,換上簡單便服在旺角上堂,從未做過瑜伽的她做拉筋熱身,再看導師示範四式動作。家燕姐看到吊床時,對其承托力存疑,當確定安全可靠,才坐上吊床,還嘗試逐一把手腳伸展,動作由淺入深,先是蹺腳坐在吊床玩氹氹轉,跟着再轉甫士,把身體平躺,手腳伸長舒展筋骨;她也有利用右腳穿過吊床借力屈膝,左腳則向後配合拉直,每挑戰成功一個難度較高的動作,家燕姐都一臉得意,更高舉V字手勢。其間她更一度講爛gag:「好輕功,估唔到一個咁重嘅人,都可以身輕如燕,正如薛家燕。好吊床,一個好似絲帶咁嘅吊床,竟然可以吊起一個咁肥嘅人,亦遮起佢嘅肥肚腩,絕!」

心郁飛高倒轉

半小時的空中瑜伽,對家燕姐來說是一大考驗,加上她日前在內地吃生蠔後屙嘔不適,甚至昏迷兩分鐘,剛痊癒便做瑜伽,所以學習時量力而為,她說:「其實瑜伽動作擺嘅姿勢好靚,難度亦好高,真係唔係一朝一夕。瑜伽可以喺好舒服環境下,做啲柔軟動作,雖然唔算劇烈運動,但都會出汗。我見佢仲有啲飛高倒轉動作,我都好想下一步可以做得到,要慢慢嚟,等我做好啲先。」

家燕姐計劃每周抽兩至三日時間鍛煉身體,做瑜伽練氣,她說:「人又苗條啲,動作平衡力都好啲,呢方面我要加緊努力。」她又表示希望似導師好靚、好型:「條腰唔似我要遮嚟遮去,冇理由佢越嚟越靚,我就衰退,咁就有動力嚟學。」早於去年底在紅館開騷前,導師曾游說家燕姐做瑜伽,無奈時間難配合。

拍戲傷半月板

左膝有舊患的家燕姐,因當年復出拍電影《黑玫瑰之義結金蘭》時拉傷,她說:「諗住以前都拍開打戲,試戲時冇用力,到嚟真先用力,就係咁疏忽咗,又忘記咗已拍到半夜,就係咁拉傷左膝半月板,醫生事後有叫我好番都要做吓運動練番,我冇做足,𠵱家變成舊患,跳舞都要戴護膝或叫排舞師就住。不過,年紀真係呃唔到人,身體似機器,有唔妥地方要保住。」
場地提供:Treehouse Yoga

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載