› 選擇地區
三藩市
紐約
洛杉磯
其他美國地區
香港 台灣 北美
 
2019年05月27日

【澳門直擊】澳門騷大派火龍果
張敬軒凸腩跪爆褲

軒仔穿上紅色印第安透視裝時,驚現粗腰。

張敬軒前晚在澳門舉行一連兩場演唱會,今次軒仔在澳門站帶了兩套新歌衫及新歌《空手而回》,他以紅色印第安透視裝登場獻唱《酷愛》,明顯面圓圓兼腰間長了不少肉,有歌迷大叫:「肥咗嘅?」

軒仔也在台上自嘲:「我今日唔可以鞠躬太多次,因為頂住個雞冠頭(印第安頭飾)同埋個肚腩。」而他穿另一套紅色西裝現身時,右邊頸上驚現「咖喱雞」,之後他再唱出《靈魂相認》時投入到跪低,他驚叫:「我諗我真係肥咗,我跪爛咗條褲呀,Oh Shxt!」他更自嘲肥到似糯米雞,幸好只是膝蓋位置爆開,未有走光。

「肥咗兩三磅啫」

在安哥部份,軒仔以近期紅爆的「火龍果」身份處女登台,穿上一身螢光黃套裝配粉紫假髮,大唱改編自容祖兒新歌的惡搞歌《Pretty Hungry》,更向台下掟火龍果,全程扭腰趷籮,他抵死說:「我係咪靈活過嗰個老嘢張敬軒呢?今晚冇帶祖兒姐嗰個假髮,今次係我嘅告別樂壇之作。」軒仔在騷後受訪,解釋頸上的「咖喱雞」敏感所致,笑言開騷前似坐月:「我排完舞食好多㗎,都係肥咗兩、三磅啫,鏡頭前梗係咁講啦,唔通話二、三十磅咩?肥到落膝頭哥,香港站我都有跪都冇爆褲。」

問到「火龍果」閃電退出樂壇,他笑指會為容祖兒復出:「佢發夢都叫住祖兒。其實𠵱家喺街,啲人叫我『火龍果』多過張敬軒,睇吓『火龍果』有乜搞啦?」軒仔更爆自費在淘寶買200個道具火龍果掟給觀眾,他說:「仲貴過真㗎。」
採訪:盧妹
攝影:林賓尼

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載