› 選擇地區
三藩市
紐約
洛杉磯
其他美國地區
香港 台灣 北美
 
2019年06月19日

眾星揶揄林鄭五無記招
袁彌明:幫緊7.1遊行吹雞

香港人周日200萬+1人上街反送中,民怨沸騰。昨日特首林鄭月娥第二度開記者會,親口向香港人道歉,但卻被狠批「五無」記招,皆因她拒絕撤回送中惡法,對平反暴動、釋放被捕示威者、追究警方濫暴及下台等亦統統迴避。記招播出後藝人如袁彌明、黃秋生及王宗堯等個個唔收貨,袁彌明更以短訊回覆本報︰「佢係幫緊7.1遊行吹雞!」

林鄭昨日下午4時開完記招後,繼續難平民憤。於6.16帶埋爸爸遊行的袁彌明,昨日以短訊回覆表示:「冇人會收貨,多此一舉,佢係幫緊7.1遊行吹雞!」而同樣參與兩次反送中遊行的王宗堯也揶揄林鄭:「唔好再玩我哋啦,你忙我哋都忙,唔係淨係你時間寶貴,年輕人啲光陰仲寶貴。」對於林鄭拒下台,他表示:「係,死都話畀多次機會,又話仲有好多嘢想做。撤回!撤回暴動罪!下台!道(歉)得咁hea由9佢!」

秋生:個個都想佢死

至於黃秋生則指對林鄭說話沒期望:「估到啦!佢會辭職先奇。」問林鄭道歉市民會否收貨?他說:「我估就唔得嘞!都話佢講地球係圓都冇人信!冇得搞㗎喎!個個都想佢死,連建制都係,不如搵個高人開個盤睇吓有冇輔助星啦!」問他收貨嗎?他就打個譬喻:「日日開一次記者會講同一樣嘅說話冇用㗎。即係阿媽叫個仔讀書,讀書呀、讀書呀!鬼食泥咁,個仔都係打機㗎箒,不如搵個補習老師啦!」

邵仲衡亦指︰「今日已經唔可以再轉彎抹角,佢仲攞番台灣件事出嚟講……我想奉勸特首一句,世事如棋局局新,坐得呢個位,唔好亂嚟。」樂隊RubberBand成員泥鯭就插爆林鄭得把口:「真係有誠意嘅話,就直接回應市民嘅訴求,唔係口講誠意,心裏同香港市民鬥氣。」而另一樂隊Kolor成員、盧巧音老公蘇浩才也在Ig表態,以黑底白字post「厚顏無恥」及「下台」。

鄧達智:創傷已造成

導演張堅庭則指:「我未睇直播記者會,不過要我原諒一個將我推落懸崖,然後靠我自己攬實啲樹枝跌唔死爬番上來,佢眼濕濕話對唔住,畀多次機會我幫你搽紅藥水,你驚唔驚,你會原諒佢?」著名設計師鄧達智坦言︰「道唔道歉,個創傷已經造成!佢起碼要撤回啦,唔係只道歉。」而去年發現患癌的903 DJ雲妮,亦留言:「我真的不能再被林鄭影響我的健康,不值得為此人動怒。」
採訪︰鍾國仁、皓騫、林妃、陳杰、李森

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載