› 選擇地區
三藩市
紐約
洛杉磯
其他美國地區
香港 台灣 北美
 
2019年06月21日

【娛樂人物】拍節目難忍ERROR篤手機
黃淑儀有個老闆夢

黃淑儀(GiGi姐)首次與ViuTV合作,就製作她最擅長的烹飪飲食節目《Cooking GiGi台灣篇》。早前GiGi姐夥拍ERROR其中兩位成員梁業與吳保錡到台灣拍攝,GiGi姐日前接受《蘋果》專訪笑謂:「初初最忍唔住係佢哋篤手機。」廚藝了得的她原來有個老闆夢,坦言好想開車仔麵檔,但最後被老公勸阻。

撰文:盧妹
攝影:陳俊強

相關新聞:【70年代花旦】入行即拍香港首部長篇劇

黃淑儀斷斷續續在無綫經歷近50年的歲月,由70年代的當家花旦,到2005年開始主持《吾湯吾水》等飲食節目大受歡迎。近日GiGi姐離巢轉到ViuTV,與以搞鬼見稱的ERROR其中兩位成員梁業(肥仔)及吳保錡,到台灣拍攝ViuTV烹飪飲食節目《Cooking GiGi台灣篇》。日前GiGi姐與肥仔及保錡在觀塘接受《蘋果》專訪,廚藝了得的她坦言曾想過開車仔麵檔,不過最後被老公勸阻。

GiGi姐表示有朋友在新加坡開麵檔:「我都好恨、好想開,但係我先生話又要自己買餸、又要煮、又要洗、又要收銀,仲要交租,真係搵自己笨,所以我都係請朋友返嚟食就算,我享受煮畀人食,見到佢哋話好味,我就好開心。」雖然GiGi姐沒有開店,但就不時主持電視節目,以另一個途徑與觀眾分享廚藝。

教餐桌禮儀

今次GiGI姐與ERROR合作主持節目,但她卻直言在合作前從沒有聽聞過ERROR:「真係冇聽過,直到知道同佢哋合作做節目,大家都係新合作就要去睇吓,我同自己講,要畀最大嘅容忍量畀佢哋。」身旁的保錡表示細細個已經是電視迷,所以認識GiGi姐的劇集,他更自爆首日開工與對方見面時,不敢與她交談。肥仔即附和說:「佢真係縮埋一嚿唔敢講嘢,我自己就冇事前起GiGi姐個底,我想親身去feel吓。」

保錡以「慈祥媽媽」來形容GiGi姐:「GiGi姐好肯同我哋溝通又肯教,你會好想聽佢講嘢。」肥仔則覺得GiGi姐會很理性為他們分析:「佢同你講啱或者錯嘅嘢,一定有佢道理,真係袋好多錢入你袋,平日點樣唔好失禮、餐桌禮儀都係GiGi姐教。」

GiGi姐坦言攝製隊的形象很重要,她希望台灣朋友感到香港攝製隊是有禮:「初初最忍唔住係佢哋篤手機,我煮嘢嗰陣,佢兩個唔使喺度,但我都希望佢睇住,咁樣到食嗰時先可以講番個過程。初初佢哋唔知閃晒去邊又玩手機,領悟到幾多真係唔知。」經過這次的台灣之旅,她大讚兩個小朋友很努力:「佢哋都乖又肯學,到後尾仲有煮番嘢畀我食,好好呀,我會畀80分佢哋。」

相關新聞:【兼職教下廚】謝霆鋒主持節目再賣餅

「我有我風格」

多次拍攝烹飪節目的GiGi姐今次是與ViuTV首次合作,問到拍攝上有何不同?她說:「我有我風格,我會問清楚導演要乜嘢程序,睇吓要預先準備乜嘢,去到邊度我都係咁做。有時,我以為好簡單、大家會明嘅嘢,原來都要示範,始終ViuTV嘅觀眾後生啲。我自己都有睇其他節目去參考,好似整沙律,我會放入個保鮮袋shake勻啲醬,都係睇外國節目學番嚟,基本上煮嘢食係各師各法,上海人同南方人煮嘢食已經唔同方法,冇話邊個手法啱定唔啱。」
場地提供:Rent a Kitchen
ERROR服裝提供:Ice Fire

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載