› 選擇地區
三藩市
紐約
洛杉磯
其他美國地區
香港 台灣 北美
 
2019年06月24日

【馮仁昭四圍超】
鍾景輝指重拍有難度
《牛下》保留心穎等播

黃心穎今年4月被爆偷食人夫許志安,形象插水,要即時停工,復工無期,而佢一早拍好嘅四部無綫劇集《堅離地愛堅離地》、《丫鬟大聯盟》、《牛下女高音》同《法證先鋒IV》都受牽連,《堅離地》被抽起播出無期,《法證先鋒IV》要重拍,不過據知無綫上周五開會之後,已決定《牛下女高音》唔會重拍,心穎有得留低,祈望安心事件丟淡後,可以安排原裝版本播出。

「有啲景冇咗」

有份主演《牛下》嘅鍾景輝(King Sir),噚日接受傳媒訪問時直認收過呢個消息,佢話:「聽見少少啦。」問到係咪擔心老人家重拍太辛苦?佢話:「唔係,佢哋好難召集演員時間,同埋有啲地點冇咗,好似大埔嗰個天鵝湖(白鷺湖互動中心),打風後都冇晒啦。」係咪覺得原裝版本出街仲好?佢話:「公司決定,我冇所謂。」而之前有傳會頂替心穎拍《牛下》嘅江嘉敏就話未收到通知。


至於起用湯洛雯頂替心穎重拍嘅《法證先鋒IV》,日前影到湯洛雯着婚紗拍攝,已接近埋尾。據了解,《法證IV》因為係中港合拍劇,有心穎參演根本冇可能過到內地審批,所以即使損失逾千萬都要重拍,否則損失仲大。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載