› 選擇地區
三藩市
紐約
洛杉磯
其他美國地區
香港 台灣 北美
 
2019年06月27日

【馮仁昭四圍超】馮盈盈撐盡師姐選港姐
「佢係校花係我偶像」

新一屆港姐日前進行首輪面試,前晚馮盈盈喺將軍澳錄影節目,對於其中一個參賽者Mina Yeung話係佢同學,盈盈指對方係同一個學系嘅師姐:「我哋有一齊參加過攝影學會嘅模特兒活動,佢喺大學嘅時候,已經係風頭躉,嗰陣我仲係寂寂無聞,不過我喺大學贏得大專校花呢個美譽,其實都係因為佢,我先有『食營校花』呢個稱號,大家誤會咗我做佢。之前有人話我係港大校花,我已經話係一場誤會,佢先係校花!」

波霸係朋友

盈盈又話:「佢仲係我偶像㖭,因為佢畢業之後試過好多唔同工種。」佢透露另一參賽者、33D波霸黃嘉雯都係佢朋友,未入行已經識,對方面試前都有問佢意見,大讚對方有潛質。

同場15年港姐麥明詩埋位前唔小心整傷腳,佢自嘲好論盡。講到今年港姐,佢話有留意,「我記得有一個話係狀元,有啲人喺留言度tag咗我,話佢成績幾好。」講到呢位尖子曾樂怡被笑打扮似大媽,麥明詩就話有潛質可以改善,仲話自己幾年前同𠵱家都好大分別,讀書時專注學業唔識打份。

雷莊𠒇打氣

至於已經卸任同返加拿大生活嘅17年港姐冠軍雷莊𠒇,亦有喺Ig貼文分享感受。佢話回想當日睇到有人無理嘅批評,覺得好惡心,仲話嗰啲人冇同理心、同情心,所以可以無視佢哋同忘記佢哋,叫參選者唔好俾負能量侵蝕。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載