› 選擇地區
三藩市
紐約
洛杉磯
其他美國地區
香港 台灣 北美
 
2019年07月27日

【娛樂人物】創業老公唔畀偷懶
黃婉曼成功在堅持

黃婉曼不甘心只做幸福少奶奶,仍熱切追求理想。

前天氣女郎黃婉曼(Icy)最近斥資逾百萬在將軍澳開餐廳,她笑言傾盡私己錢都不夠,要馬主老公馮柏基補貼。由於未知何時回本,Icy被老公督促勤力巡舖,尤其周六周日更不准偷懶。Icy明白創業容易守業難,更學會一個道理:「唔係明知會成功先去堅持,而係因為不斷不斷堅持,所以最後先會成功。」
撰文:比華利
攝影:陳慧安

相關新聞:暫緩追仔計劃

黃婉曼2014年嫁予馬主馮柏基,婚後生了兩名囡囡,Icy不甘心只做幸福少奶奶,仍熱切追求理想,大前年在鰂魚涌創業開了麵包學校,另一目標是開餐廳。苦幹了三年多,近日她終如願以償。

Icy去年籌備新餐廳時意外懷孕,過去九個月,她同時孕育肚中BB和新店,忙得分身乏術。她最近坐完月出關,馬上準備餐廳開幕,她日前在店內接受專訪時大講生意經:「呢個概念店,由我搞麵包學校,四年前都想做,但香港地租太貴,咁我惟有上樓先,𠵱家創業三年後,終於可以有地方啱搞,有嘢食、有酒飲,仲可以喺度學整甜品麵包。」

出動私己錢

實現夢想必要財力充足,Icy表示新餐廳斥資七位數字,她說:「投資係大,將以前努力做嘢賺啲私己錢放番入去,老公又要貼啲,各方親朋好友都幫手,有嚟幫襯我嘅朋友都當佢哋投資。」大前年開麵包學校時,剛巧她也腹大便便,看來兩女都旺生意,Icy說:「真係唔知邊樣先,可能我係一個冇乜計劃嘅人,同時擁有自己生意同兩個囡囡開心同忙嘅,總之發生咗就嚟啦。不過我有少少對唔住細女,我坐完月就出嚟睇住間舖,擺咗佢喺屋企。做地舖要親力親為,細女得兩個月大,佢喺屋企飲奶食飽飽就瞓覺,有時我會帶埋大女返工,佢返附近幼稚園,我就留喺舖頭。我pack麵包,佢會幫手,又會拎紙巾幫我抹枱抹窗。」

一切為囡囡

可打算把店留給囡囡繼承?Icy說:「我做間舖都係為囡囡,希望為佢哋做啲嘢。」是否有意18區開分店?她說:「搞好呢間先,做生意我都係初哥。有內地同韓國朋友問過,麵包店會唔會跳出香港?我唔敢咁大諗頭。」

Icy明白創業容易守業難,她卻有信心:「一步步嚟,真係唔容易計到幾時回本,呢幾年我學到一個好重要嘅道理,唔係明知會成功先去堅持,而係因為不斷不斷堅持,所以最後先會成功。老公出錢出力,畀咗好多意見,做決定仲會幫我一齊諗,周六周日會督促我唔好偷懶,佢會話舖頭好多客人,你快啲出去返工。」她感謝老公幫手湊女,令她安心出去巡舖。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載