› 選擇地區
三藩市
紐約
洛杉磯
其他美國地區
香港 台灣 北美
 
2019年08月14日

【add名人時尚】男生妝技

現今男女平等的社會,化妝不再是女性專屬,Chanel在去年9月破天荒推出Boy de Chanel彩妝系列,Givenchy也跟風推出Mister系列,可見美妝男的市場崛起,不再是韓男專利。教拍男士化妝片的KOL RickyKAZAF,指只要捕捉六大重點,「男人都可以化全妝!」

採訪、撰文:黃嘉琪  
攝影:郭賢興  
服裝提供:COS  
場地提供:KAZAF ACADEMY

粉底

Step 1.用粉底棒畫在臉部較突出位置,如額頭、鼻樑、顴骨和下巴,再用手指或海綿輕輕印開,然後在鏡子前細看皮膚,確保底妝完全貼服。
Tips
市面上的粉底偏白,可以選擇與頸部膚色相近的色調,另外粉底液不要直接倒上臉,應該先倒在手背,再沾取適量的粉底液上妝。

修容

Step 2.選擇深兩度的粉底液掃在腮骨和鼻翼兩邊輕輕印開,令臉部輪廓和五官更加立體。
Tips
大部份修容產品都以粉狀為主,但男士的妝容應避免使用粉狀質地,建議以粉底液或遮瑕筆取替陰影粉。

遮瑕

Step 3.用遮瑕膏點在有瑕疵的地方,然後用遮瑕掃在遮瑕膏沿邊位置掃開,看起來更自然。
Tips
不要用遮瑕膏大範圍遮瑕,因為其質地普遍偏乾和厚身,若保留少許皮膚的毛孔和質感,妝感更自然真實。

定妝

Step 4.用定妝噴霧全臉噴上保濕,等待皮膚吸收變得乾爽後,便能達至定妝效果。
Tips
定妝噴霧比定妝粉末更好,一來令肌膚較水潤有光澤感,二來掃碎粉容易出現浮粉情況。

眉毛

Step 5.在眉山和眉尾位置加深,並填補眉毛間的空隙,也可以畫低一點眉頭,看起來更顯精神。
Tips
眉筆的顏色可以選擇比頭髮淺兩度的色調,另外灰色和啡色比較自然,若想塑造利落的眉形,不可忽視修眉的習慣。

唇妝

Step 6.塗上透明無色的潤唇膏,滋潤乾燥爆坼的嘴唇,增添光澤感,完整乾淨醒目的妝容。
Tips
普遍男士的唇色偏深,揀潤唇膏時不妨選擇有防曬成份的唇膏,以免唇色越來越變得暗沉。

【可用工具】

RickyKAZAF 男妝趨勢

黃佑誠(RickyKAZAF)為香港首位專教男性化妝的KOL,曾是藝人馬浚偉的御用化妝師,擁有十年化妝經驗的他,初時受韓風及天團BIGBANG啟發走上美妝之路,眼見男士化妝在香港開始變得普遍,化妝技巧也可能比女生更純熟,RickyKAZAF說:「我覺得呢幾年多咗男仔化妝,喺街上都見到啲男仔會化小小眉妝或底妝,整體係有好多男仔可能化咗妝,但又唔會眨眼間察覺得到,呢個係見到個趨勢的分別。」

RickyKAZAF指有些男士可能特別需要化妝,但不要完全改變自己:「皮膚質素唔算太理想,有紅印、暗瘡印等,想望落去乾淨啲就需要化妝,如果本身靚嘅話,化妝部份純粹改善一啲唔夠靚嘅地方就已經足夠,唔需要化一個好厚嘅妝,令個樣變咗,呢個係男仔妝好重要嘅一個point。」他也認為男仔化妝不再被批評「乸型」等負面形象:「𠵱家嘅男仔睇多咗網絡資訊,又會自拍,放相上網嘅時候,其實化妝呢件事相對嚟講接受度會高咗好多,雖然以前男仔化妝係比較負面。」識化妝的男性會否更易擴闊社交圈子?他說:「係,一定係容易識好多!化妝本身係個女仔嘅topic,其實你淨係好簡單share一啲化妝扮靚嘅資訊,大家嘅話題已經多咗,另外因為化咗妝,其實個人望落去精神啲,畀人感覺第一印象一定會好好多,更容易識朋友或女朋友。」

改變人生

RickyKAZAF在線上線下近年幫不少素人做makeover,坦言最開心係見到before & after:「好多時我改造完嗰個人之後,都唔記得佢之前個樣,望落去吸引好多。另外,恒久啲嘅開心係我見到佢哋個人嘅變化,有個case係嗰個人好年輕,但外表好老,改造完之後,佢嘅自信心多咗,講嘢大聲咗,呢個唔係淨係改變造型,反而好多嘅makeover係改變佢哋嘅人生,意義重大。」RickyKAZAF除了自己出書、開辦課程教化妝,還是IVE學院新開辦的KOL課程專業顧問,相信化妝扮靚不單止無分男女,還會有年輕化的趨勢。

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載