› 選擇地區
三藩市
紐約
洛杉磯
其他美國地區
香港 台灣 北美
 
2019年09月11日

【娛樂人物】邵氏武打明星拍劇唔俾打
羅莽寸無綫「怕我搶主角鏡」

邵氏70年代武打明星、現年67歲的羅莽,自12歲起學南派朱家螳螂,數十年來每早起床的第一件事,都是練功夫。日前羅師傅接受《蘋果》專訪,近年已離開無綫的他提起舊東家,直言後悔接拍劇集《城寨英雄》,由於冇得打促使他心淡離開,羅莽說:「最唔開心係冇機會畀我發揮,一招都唔畀我打,可能驚我搶咗主角戲份。」
撰文:余燕儀
攝影:陳俊強

相關新聞:亡妻情深義重

羅莽最近跟細20年的女友戀情曝光,再度成為話題人物,30年前喪妻的羅莽透露八年前認識了現任女友Vienem,他低調地說:「求其搵個人陪吓就算,男女之間合就喺埋一齊,多謝傳媒咁關心,但問得多係一種壓力,希望大家唔好畀咁多壓力我。」問會否介意被指是父女戀?羅莽說:「唔緊要,現今社會好開放,我唔覺得乜嘢一回事。」

功夫嚇窒外國人

新一代的觀眾,大多對羅莽的搞笑形象深刻,但原來他在70年代入行,首部電影就剃光頭拍張徹導演的武打片《少林寺》,其後更憑電影《五毒》紅到去美國。他說:「邵氏係我嘅光輝歲月,TVB係鍛煉我嘅演技同磨練我嘅毅力,兩個地方我都得到好多好處,最近拍《Made in Chinatown》,我扮演中國黑幫,我好榮幸練功夫咁多年學有所用,因為外國人咁高大,見到我咁細粒,一見到Chinese功夫好開心,摸我個頭,我唔鍾意摸身摸勢,結果機會嚟,有場戲拍講數,我用真正嘅演技同功夫,嚇到佢哋猛食NG,之後佢哋見到我,個個都好尊重我,好有成功感。」

相關新聞:【蘋聞重溫】張徹契仔打出名堂

《城寨英雄》最遺憾

曾是武打明星的羅莽,入無綫後變搞笑藝員,他一樣敬業樂業,但卻因接拍劇集《城寨英雄》,最後帶着遺憾離開,他說:「最唔開心係拍《城寨英雄》冇機會畀我發揮,當時官方周刊搵我做訪問,問我城寨嘅事,我將自己喺城寨嘅歷史全部講出嚟,冇幾耐開《城寨英雄》,我喺城寨長大,對嗰個地方咁熟悉,如果多一啲戲份,效果出嚟係咪好啲?可惜佢一招都唔畀我打,奇怪!」問到接拍時知否戲份少?羅莽說:「通知我有份做,我諗應該唔會浪費我吖,結果監製同我講,有場戲講我強姦女仔,跟住同主角打兩三招,我都諗住打兩三招都夠啦,點知拍攝時打都唔打,一刀插我瞓喺地下。」他說事後也沒有向無綫了解:「監製叫我做乜就做乜,可能《城寨英雄》覺得我唔能夠打,搶咗主角戲份。」所以約滿唔續?羅莽坦言:「可以咁講。」問到羅莽一生有否做過後悔事?他哈哈笑說:「就係拍咗《城寨英雄》,早知唔拍,講咁多畀佢聽,拍得兩個鏡頭。」

在城寨長大的羅莽直言因家中有六個弟弟才去學功夫,他說:「城寨地方品流複雜,老竇叫我學功夫保護弟弟,我12歲開始學南派朱家螳螂,好辛苦,因為易學難精,要浸好多年先有所成就。」有否試過用功夫教訓人?羅莽坦言:「喺城寨有試過,有黑社會分子叫細佬唔好返學,細佬同我講俾人蝦,於是我去同佢理論,佢哋見我螳螂拳咁犀利,刀都唔敢抆出嚟,走都走唔切。」拍戲時遇過有對手暗中較量,羅莽說:「度招打,有啲本來打上面,但佢特登打下面,好百厭!好托賴,練功夫練咁耐,我一直持之以恒,好大膽講未試過撞到對手。」
場地提供:The AIR(The ONE)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載