› 選擇地區
三藩市
紐約
洛杉磯
其他美國地區
香港 台灣 北美
 
2019年11月12日

和平紀念日不和平
藝人鬧警開槍殺戮
杜汶澤:黑警屠城

昨日是和平紀念日,但這個紀念兩次世界大戰死難者的日子一點也不和平。網民昨日號召全城三罷,發起和理塞「黎明行動」癱瘓交通捍衞自由,警方卻在多區亂射催淚彈,包括中環鬧市、將軍澳等,令不少市民無辜中招。昨早有黑衣人在西灣河堵路,一名交通警在毫無警示下連開三槍,其中一槍近距離射中一名手無寸鐵的21歲青年腹部,性命垂危,又有交通警在葵芳駕電單車撞向人群,全港各處風聲鶴唳。警員濫暴引起全城藝人鬧爆,杜汶澤更直言昨日是「黑警屠城」。
撰文:翁可人

相關新聞:袁彌明撐罷工 Do姐暫停節目

在大前日已表態昨日會罷工的杜汶澤,在交通警開槍後,先在fb以黑底白字寫上「1111黑警屠城」,隨後又接連留言:「你讓子彈多飛一會,子彈已打在別人的兒子身上。你僥倖逃過,好好上班吧!然後盡快忘記此事,以後也別再大聲吶喊。」更表示:「覺得香港人真係好鍾意返工。」他隨後又留言:「慘?咁你要問自己一句,你有資格傷心嗎?」

何韻詩:香港人,忍夠喇!

何韻詩昨早先在Ig留言:「首先要問嘅問題係,兩位少年喺佢拔槍前本身冇攻擊性動作,亦冇任何武器喺手,有冇逼切性,有冇必要拔槍?用警棍或者等候支援唔得嘅?警察通例要求警員任何時候,要先用最低武力制服對方,呢個係咪已經係最低武力?」隨後又在fb貼出交通警駕電單車撞向人群的片段:「黑警意圖謀殺!當自己打緊機啊?今日交通警收到個指示係咪『殺無赦』?」義憤難平的阿詩繼續貼文:「黑警屠城。點解你仲可以安然返工?」、「香港人,忍夠喇!無限期三罷啦!」呼籲大家作無限期抗爭。

相關新聞:高志森盲撐警開槍

王宗堯:係咪想取消區選?

王宗堯昨午現身譚小環開設的「渣哥」銅鑼灣店做一日義工,他說:「之前同小環同佢老公傾過,佢哋會將今日嘅收益捐晒去星火基金,所以雖然佢哋兩公婆唔喺香港,但我都落嚟幫手。」對於警方濫捕,王宗堯說:「唔知講乜嘢好,唔知𠵱家警察攞真槍出嚟係咪已經成為常態?總之有好多消息滿天飛,一時又話金管局限制提款,搞咁多嘢,唔知係咪想為取消或者延期嚟緊嘅區選鋪路?」

梁芷珊:你哋一定要還

昨日警員開真槍,在旁竟有名中年男子拍手示好,梁芷珊在社交網上怒罵:「你哋一定要還!」並留言:「仲撐佢嘅、喺旁邊拍手掌嘅,你哋係咪會幫手還?冇,我講緊有啲仆街爭我錢箒,但我睇住佢越使越大,身邊仲有好多人助興,𠵱家越欠越多,條數都唔知點計。我想問吓啲啦啦隊,係咪打算到時幫佢手還?」梁芷珊又發長文:「唔知呢位係家教會主席嘅開真槍警員,噚晚瞓覺之前有冇諗過今日會開槍嘅呢?個受傷市民,𠵱家就喺醫院搶救中,唔知呢位警員喺邊呢?使唔使落口供㗎?定係喺牛頭角放埋催淚彈,開緊香檳呀?」

王喜:躝番去做學警

多次公開以前皇家香港警察身份譴責警暴的王喜,昨日於fb怒斥開槍交通警:「對方對你做過啲乜嘢令你決定要拔槍、開槍?咁對方喺中第一槍後,對你做過啲乜嘢令你決定對佢開第二槍、第三槍?洗乾淨個屎忽坐監坐到你人生嘅盡頭啦!」他又斥交通警撞向人群:「國際標準:駕駛機動車輛衝向人群,就是恐怖襲擊。咁都唔識?就死躝番去做RPC(學警)!」

伍家謙:唔好麻木

無綫前新聞主播伍家謙在fb呼籲不要對警察濫權麻木:「記得幾年前,放催淚彈係好大件事,到𠵱家發生得太多,可能好多人會因為咁麻木咗。記得幾年前,射橡膠子彈係好大件事,到𠵱家發生得太多,可能好多人會因為咁麻木咗。記得幾個月前,抆真槍出嚟係好大件事,到𠵱家發生得太多,可能好多人會因為咁麻木咗。記得個幾月前,向天開槍係好大件事。到𠵱家發生得太多,可能好多人會因為咁麻木咗。再睇埋今日嘅事之後,唔好麻木,麻木會成為歪理變常態嘅養份。」

藍奕邦:典型惡霸

藍奕邦在fb留言:「還選擇跪低的人,還選擇獻媚奉承的人,還選擇中立的人,還選擇沉默的人,你們今日還過得安樂嗎?」他又在twitter轉載一張白髮婆婆疑被警方拘捕的圖片,以英文斥警方是典型惡霸。

鄭敬基:不能多個周梓樂

鄭敬基在Ig貼文,向中槍少年打氣:「年輕人,你要活過來,為屬於你和你們這一代的香港未來要健康起來。我們不能再多個周梓樂,我們受不了再多個陳彥霖。此時此刻香港烽煙四起,每個人心如果還有靈魂都在下沉,想着今天、今晚如何完?」

陳志健:希望大家平安

陳志健昨日到新城接受訪問,他坦言:「今朝出門口都好塞車,塞咗兩個鐘頭先嚟到。」至於交通警槍傷年輕人,他表示:「睇到新聞都好唔開心,都係嗰句希望事件盡快平息大家平安。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載