› 選擇地區
三藩市
紐約
洛杉磯
其他美國地區
香港 台灣 北美
 
2019年11月19日

校友邵仲衡梁芷珊籲救學生
鄭敬基理大外食催淚彈「好擔心年輕人性命」

反送中運動持續五個月,前日開始理大校外爆發激烈警民衝突,各界呼籲聲援理大,不少藝人都挺身發聲。昨日鄭敬基更親身到尖東支持,其間更要邊跑邊避催淚彈,他接受《蘋果》電話訪問說:「我見到兩個媽媽喊得好淒涼……大家都好擔心年輕人嘅性命。」校友梁芷珊就在網上呼籲:「請大家基於人道立場,去救助有需要人士。」舊生邵仲衡接受訪問大表心痛說:「政府越止越暴,越暴越製亂,點解唔回應巿民訴求去解決問題?」

相關新聞:藝人鬧理大校長呼喚學生

繼「中大保衞戰」後,前日再爆「理大攻防戰」,未有出現支援學生的理大校長滕錦光被指冷血,至昨早滕錦光透過公關向傳媒發放片段,指曾希望到校內與學生會面,但警方指危險及不適合,並指希望抗爭者接受建議,和平離開校園。前晚鄭敬基在Ig貼出黑底白字圖,強烈要求理大校長與林鄭月娥直接對話,以確保學生安全,他又稱林鄭身為理大校監,有責任保障學生。到昨日鄭敬基獨自到尖東和理非,他在尖東與理大接壤的一條電梯口,接受《蘋果》電話訪問。

真係喊得好淒涼

鄭敬基說:「我見到一、兩個媽媽,因為佢哋嘅仔女喺學校入面,所以佢哋真係喊得好淒涼,就算前面係一班防暴,佢哋都好大聲喺度鬧、喺度嗌,因為唔知學校裏面點,就算學生衝出嚟,周圍都好似部署咗遠程射手,大家都好擔心年輕人嘅性命。」鄭敬基譴責警方濫暴:「周圍啲人就算和理lunch,都俾佢哋喝罵,話你哋做乜要戴口罩?再戴口罩就拉你哋。」跟着電話中傳來他的氣喘聲,原來他正邊跑邊避催淚彈,其後他到安全地方暫竭,自拍短片作出呼籲:「我希望,警察先生,高抬貴手,佢哋真係太年輕,呢啲小朋友有好幾十年未過嘅生命。」

相關新聞:導演鄧卓儒疑被補

轉領導人息民憤

邵仲衡是理工大學室內設計系1983年畢業生,看到母校變成抗暴戰場,非常心痛。他昨日接受《蘋果》電話訪問時感慨地說:「我諗任何一個讀過理工嘅人,個心都會好唔舒服。」他指雖然留守的人未必是理大人,但都是香港人,問題源頭在於香港領導班子:「佢哋接上面order止暴制亂,但變得越止越暴,越暴越製亂,點解唔去用政治方法去解決問題,去回應巿民訴求。」他指出警方在各區射大量催淚彈,嚴重影響環境影響健康,他語重心長說:「而且會俾外國見到香港優點慢慢消磨,變成唔適合嚟投資同生活,領導班子係咪要諗吓轉個方法,或者轉一個領導人去平息民憤,𠵱家正係畀一個唔識揸車嘅人去掌控架靚車。」他表示前晚徹夜難眠,不停收到理大的老師和校友訊息,叫大家作出聯署呼籲救學生,他續說:「我希望每一位學生同抗爭者都可以平安出返嚟,即使佢哋有錯被捕,警方都要用人道方式對待,唔可以有警暴當佢哋係罪犯。」

另一個理大舊生、才女梁芷珊前晚在社交網留言:「我係1990年理工畢業生,現公開請求理大校長滕錦光教授現身,處理目前在理大校園嘅情況。」之後再拍片:「喺呢度我呼籲請大家基於人道立場,用你正確,合理、立法嘅方法,去搵出可以幫助到𠵱家需要救助人士嘅方法,多謝大家。」
採訪:皓騫、陳杰

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載