› 選擇地區
三藩市
紐約
洛杉磯
其他美國地區
香港 台灣 北美
 
2019年12月03日

【娛樂人物】逆市搏殺 望港人團結
李雨陽有危就有機

李雨陽堅持力不到不為財,現時樓面、水吧、收銀加宣傳一腳踢。

李雨陽曾因拍攝青春偶像劇而被捧紅,但少年得志令他飽嘗挫敗,20歲出頭欠債40萬。坎坷過後慶幸能夠大翻身,如今不僅成為一家之主組織家庭,還開食店做老闆,夫唱婦隨拍住上開檔,不足一年在逆巿搏殺再開分店。曾經陷入谷底的李雨陽希望香港人能發揮團結、捱得和抵諗精神,令街上旺舖重現。

相關新聞:一日食一餐

現年40歲的李雨陽歷盡滄桑,闊別香港娛樂圈一段日子,現在無債一身輕,大半年前在觀塘投資開設泰式食店,經過連月抗爭運動,慶幸生意仍能自負盈虧,近日他低谷入手以接近七位數字在深水埗再開食店,富貴險中求,他認為有得博:「有危就有機,大家都退嘅時候,我哋進可能有先機,如果社會問題經過某一段時間解決到,所有嘢都會緩和上升,想再頂一間類似舖頭就唔係呢個價錢。」

家庭係動力

10月中開業初期,由於正值抗爭運動升級,李雨陽最初一日只得數百元生意,他曾捧着串燒到街上宣傳,可惜乏人問津,接近一個月生意額才有上調。吸取人生經驗的他堅持力不到不為財,不想失業,現時樓面、水吧、收銀加宣傳一腳踢。

從藝人轉投飲食業,李雨陽感覺比以前辛苦,他說:「以前拍戲4、5點起身到凌晨12點先收工,攰得嚟好開心有滿足感;做飲食業刻板,每日返工收工時間一致。返過內地再返香港工作又係兩樣嘢,香港工作開心嘅係可以返屋企睇小朋友,唔需要離開一頭半個月,收工視頻屋企同囝囝講好掛住佢,可以返去攬住個仔。」他在幕前仍有工作,近日為開電視節目《Fit開有條路》擔任主持,他視現階段是人生一個圓滿:「有自己家庭,娶咗老婆生咗個仔,一家三口好開心,太太同小朋友係我動力,推動到我向前行,做每一樣嘢同決定都會諗屋企先。」

要調整心態

放下身段投身基層工作,李雨陽認為心態最重要,他說:「唔好覺得自己有乜咁巴閉高高在上,放開啲嚟睇你都係一個人,每樣嘢都係一個職業,如果有框架思想局限自己,你好難行出一步,唔如意或者谷底時更要放鬆。」還看今朝自己衰甚麼?李雨陽語帶悔疚:「主要自己問題,每一個人點解生活到咁,唔關命運際遇 ,好多前輩都話機會係畀有準備嘅人,嗰時我諗咁紅行一條街都40、50人搵我影相,仲唔係ready咗?有乜戲畀我做唔得呀?但就係啲戲唔得,冇經驗、冇技術、冇演技。當時目空一切,點睇到自己有問題。」
撰文:卓寶花
攝影:林賓尼

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載